ԵՐԵՎԱՆ, 6 դեկտեմբերի — Sputnik. Եվրասիական միջկառավարական խորհրդում Հայաստանի ներկայացվածության հարցը Երևանի համար զգայուն է, ասել է Հայաստանի վարչապետի պաշտոնակատար Նիկոլ Փաշինյանը Սանկտ Պետերբուրգում Եվրասիական տնտեսական բարձրագույն խորհրդի նիստի ընթացքում։
«Ղեկավարվելով գործընկերային հարաբերությունների սկզբունքով և կառուցողական մոտեցումով այն ոլորտներում, որոնք վերաբերում են մեր միության գործունեությանը, մենք չենք պնդում, որ այդ հարցը պետք է անհապաղ քննարկել և ընդունել համապատասխան որոշում», – ասել է Փաշինյանը։
Նա նշել է, որ Հայաստանի համար դա զգայուն հարց է, և Երևանը կցանկանար այն թողնել քննարկումների ընդհանուր օրակարգում` բոլորի համար փոխըմբռնելի որոշում կայացնելու համար։
Հայաստանում սահմանադրական փոփոխություններից հետո պետության ղեկավար է դարձել վարչապետը։ Սակայն երկրի վարչապետը ԵԱՏՄ կանոնակարգով ստիպված է մասնակցել ինչպես Եվրասիական տնտեսական բարձրագույն խորհրդի գագաթնաժողովներին, այնպես էլ ԵԱՏՄ միջկառավարական խորհրդի հանդիպումներին վարչապետի ձևաչափով։
ԵԱՏՄ միջկառավարական խորհրդում Հայաստանի վարչապետին փոխարինելու համար պետք է շտկումներ կատարել նրա իրավական կարգավորումներում։
Նշենք, որ նոյեմբերի վերջին Մինսկում Եվրասիական միջկառավարական խորհրդի գագաթնաժողովին մասնակցել է Հայաստանի փոխվարչապետ Արարատ Միրզոյանը։ Սակայն տվյալ դեպքում պաշտոնական պատճառն այն է եղել, որ Փաշինյանն արձակուրդի մեջ էր։