ԵՐԵՎԱՆ, 5 դեկտեմբերի — Sputnik. «Մենք» դաշինքը, որն առաջադրվել է արտահերթ խորհրդարանական ընտրություններում, իրեն անվանում է հետևողական արևմտամետ ուժ։ Այդ դաշինքի մեջ մտել են երկու կուսակցություններ` «Ազատ դեմոկրատները» և «Հանրապետությունը»։
«Ազատ դեմոկրատներին» գլխավորում է Խաչատուր Քոքոբելյանը։ 2012թ.–ին նա անցել է խորհրդարան Ռաֆֆի Հովհաննիսյանի հետ կոալիցիայով։ Այդ ժամանակ Քոքոբելյանը համաձայնել է զիջել նրան ցուցակում առաջին հորիզոնականը։ Նա դրան համաձայնել է նաև հիմա. ցուցակում առաջին տեղը զբաղեցնում է «Հանրապետություն» կուսակցության նախագահ Արամ Սարգսյանը` Վազգեն Սարգսյանի եղբայրը։
«Հանրապետություն» կուսակցությունից ցուցակի մեջ մտել է Արտակ Զեյնալյանը, որը Նիկոլ Փաշինյանի կառավարությունում զբաղեցրել է արդարադատության նախարարի պաշտոնը։ Տասնյակի մեջ է նաև «Երկրապահ» կամավորների միության փոխնախագահ Արա Կետիկյանը։ Նա առաջադրվել էր Երևանի ավագանու ընտրություններում ՀՀԿ–ից։
«Մենք» դաշինքը պաշտպանության և անվտանգության ոլորտում կողմ է պրոֆեսիոնալ բանակի ստեղծմանը։ Նշենք, որ նախորդ խորհրդարանական ընտրություններին նման կարգախոսով է գնացել «Ելք» դաշինքը, որի մեջ մտել է «Հանրապետություն» կուսակցությունը, ինչպես նաև Փաշինյանի «Քաղաքացիական պայմանագիրը»։
Արտաքին քաղաքականության մեջ «Մենքը» կողմ է ԵԱՏՄ–ից Հայաստանի դուրս գալուն։ Թեկնածուները կարծում են, որ Հայաստանի հարաբերությունները Ռուսաստանից բացի միության մյուս երկրների հետ չեն զարգանում, իսկ ԵԱՏՄ–ն օգուտ չի տալիս։ Ծրագրում ասվում է, որ ՀԱՊԿ–ի հետ համաձայնագրերը պետք է ցույց տան իրենց արդյունավետությունը Հայաստանի պաշտպանության համար։ «Մենքը» Հայաստանի համար հեռանկարներ է տեսնում ՆԱՏՕ և Եվրամիություն մտնելու մեջ։
Տնտեսության ոլորտում առաջարկվում է բարձրացնել կենսաթոշակները և պետական հատվածի աշխատողների աշխատավարձերը 25 տոկոսով։
Ամենահամեստ հաշվարկով` ուսուցիչների աշխատավարձերի նման բարձրացումը պահանջում է տարեկան մոտ 9 միլիարդ դրամ (այն հաշվարկով, որ հանրապետությունում կա ուսուցչի 25 հազար դրույք, ինչպես նաև հաշվի առնելով այն, որ ծախսերի մի մասը կվերադառնա բյուջե եկամտահարկի տեսքով)։
Կենսաթոշակները 25 տոկոսով բարձրացնելը պահանջում է մոտ 55 միլիարդ դրամ (հաշվի առնելով, որ հանրապետությունում միջին աշխատավարձը կազմում է 40 հազար դրամ, իսկ երկրում կա մոտավորապես 460 հազար կենսաթոշակառու)։ Առաջարկում են բարձրացնել նաև թե՛ զինվորականների, թե՛ բուժաշխատողների և պետական հատվածի մյուս աշխատողների աշխատավարձերը։
Նշվում է, որ գազի և էլեկտրականության սակագները կարելի է նվազեցնել (գազը` 30 տոկոսով), բայց չի բացատրվում, թե ինչի հիման վրա դրանք կարող են նվազեցվել։
Այնուամենայնիվ, ծրագրում ասվում է, որ կարելի է այդ ամենի համար միջոցներ գտնել։
Դրա համար պետք է պայքարել ստվերային տնտեսության դեմ, որը կազմում է ՀՆԱ 30-50 տոկոսը, կարծում են ծրագրի հեղինակները։ Եթե նրանք, ովքեր «թաքնվում» են ստվերում, հարկ կվճարեն, բյուջեի ծախսերը կարելի է ավելացնել 600 միլիոն դոլարից մինչև մեկ միլիարդ դոլար։ Թեկնածուները կարծում են, որ այստեղից էլ կարելի է վճարել վերոհիշյալ ծախսերի համար։ Արդյունքում մինչև 2021–ի վերջը աղքատության մակարդակը կիջեցնի մինչև 15 տոկոս (այժմ ավելի քան 30 տոկոս է), իսկ ծայրահեղ աղքատության մակարդակը` մինչև 2 տոկոս։
Բացի այդ, պետք է շահավետ պայմաններ ստեղծել ներդրողների և նոր ձեռնարկություններ հիմնելու համար։ Այսպիսով, Քոքոբելյանը համոզված է, որ երեք տարում կարելի է ստեղծել 140 հազար նոր աշխատատեղ։
Դրա համար թեկնածուներն առաջարկում են 2024թ–ից արգելել մետաղագործական հումքի արտահանումը։ Հումքը պետք է վերամշակել տեղում` տեղի արդյունաբերությունը և գործարանները զարգացնելու համար։
Ծրագիրն ավարտվում է մշակույթի բաժնով։
«Մենք» դաշինքն այստեղ էլ է հավատարիմ մնում իրեն. առաջին հերթին, համագործակցել ԵՄ երկրների հետ, իսկ վերջում կրկին խոստանում է բարձրացնել աշխատավարձերը, բայց այս անգամ մշակույթի ոլորտի աշխատողների։