ԵՐԵՎԱՆ, 30 նոյեմբերի — Sputnik. Երրորդ երկրների հետ ՀԱՊԿ այս կամ այն անդամ երկրի ռազմատեխնիկական համագործակցության հարցերը պետք է քննարկվեն կազմակերպության ներսում։ Մինսկի կողմից Ադրբեջանին զենք մատակարարելու մասին խոսելիս`լրագրողներին ասաց ՌԴ Պետդումայի ԱՊՀ հարցերով եվրասիական ինտեգրման և հայրենակիցների հետ կապերի հանձնաժողովի առաջին փոխնախագահ Կոնստանտին Զատուլինը։
«Եթե դա դուրս է գալիս դաշնակցային պարտավորությունների շրջանակից, ապա պետք է որոշումներ կայացվեն։ Որքանով հիշում եմ, մինչ օրս զենք վաճառելու արգելքի կամ թույլտվության վերաբերյալ որևէ հարց չի եղել», – հայ-ռուսական Լազարյան ակումբի նիստի շրջանակում Երևանում ասաց պատգամավորը։
Միևնույն ժամանակ նա կոչ արեց ուշադրություն դարձնել այն հանգամանքին, որ եթե Ադրբեջանին զենքը վաճառվում է, ապա Հայաստանին այն տրամադրվում է։
«Իմ անձնական տեսակետն այն է, որ մենք պետք է հաշվի առնենք Հայաստանի մտահոգությունը, հատկապես ղարաբաղյան հակամարտության գոտում 2016 թվականի ապրիլին տեղի ունեցած մարտական գործողություններից հետո», – ավելացրեց նա։
Անդրադառնալով Հայաստանում սպասվող ԱԺ ընտրություններին Զատուլինն ընդգծեց` Ռուսաստանում ուշադիր հետևում են գործընթացների զարգացմանը, սակայն զերծ են մնում հրապարակային հայտարարություններից։
«Մենք խուսափում ենք հրապարակային հայտարարություններ և խաղադրույքներ կատարել, որպեսզի որևէ մեկը հիմք չունենա մեզ միջամտության մեջ մեղադրելու համար։ Դա Հայաստանի ներքին խնդիրն է, և ես չեմ ցանկանում շեշտադրումներ անել` թե մեզ ով է դուր գալիս, ով` ոչ։ Հարգում եմ Հայաստանը որպես դաշնակից, Հայաստանն ինձ ու ընտանիքիս շատ թանկ է։ Նախևառաջ Հայաստանին ներքին կայունություն ենք մաղթում», – ասաց Զատուլինը։
Ակումբի նիստին Հայաստանի կառավարության անդամների բացակայությունը մեկնաբանելիս` Զատուլինը ենթադրեց, որ դա կարող է կապված լինել նախընտրական քարոզարշավի հետ։