ԵՐԵՎԱՆ, 29 նոյեմբերի — Sputnik. Մոսկվայի Լեֆորտովյան դատարանն այսօր կրկին որոշել է, որ «Ռոսգոսստրախի» նախկին փոխնախագահ Սերգեյ Խաչատուրովի խափանման միջոցը պետք է լինի կալանքը։ Այս մասին հայտնում են ռուսական ԶԼՄ–ները` հիշեցնելով, որ Խաչատուրովին մեղադրում են խոշոր խարդախության մեջ։
Նշենք, որ Սերգեյ Խաչատուրովը «Ռոսգոսստրախի» նախկին հիմնական սեփականատեր Դանիել Խաչատուրովի եղբայրն է։ 2015թ–ից սկսած՝ ընկերությունը բազմամիլիարդանոց վնասներ է կրել, որը բացատրվել է ԱՊՊԱ շուկայի խնդիրներով (2017թ․ արդյունքներով վնասը կազմել է 55,7 մլրդ ռուբլի)։
Խաչատուրովը ձերբակալվել և կալանավորվել էր 2018թ․ ապրիլին։ Սկզբում նրան վերագրում էին գործողություններ, որոնք նախատեսված են ՌԴ ՔՕ 160 հոդվածով («վատնում»), սակայն օգոստոսին մեղադրանքը փոխվեց՝ համապատասխանելով 159 հոդվածին («առավել խոշոր չափի խարդախություն»), որով առավելագույն պատիժը 10 տարվա ազատազրկումն է։ Հետաքննության ավարտը նշանակված է 2019թ․ մարտի 18-ին։
Նրա փաստաբանները խափանման միջոցի դեմ բողոք էին ներկայացրել Ռուսաստանի Գերագույն դատարան, որը եզրակացրել էր` կալանավորելու ժամանակ Խաչատուրովի ձեռնարկատիրական գործունեության մասին պաշտպանության փաստարկներին գնահատական չի տրվել։ ԳԴ-ն մեղադրյալի փաստաբանների բողոքն ուղարկել էր Մոսկվայի քաղաքային դատարանի նախագահություն՝ ուսումնասիրության համար։ Պաշտպանությունը նախագահությանը խնդրել էր անհապաղ ազատ արձակել Խաչատուրովին՝ նրա հանդեպ տնային կալանք սահմանելով, սակայն նոյեմբերի 16-ին դատարանը գործը վերադարձրել էր առաջին ատյան՝ Լեֆորտովյան շրջանային դատարան։
Պաշտպանական կողմի բողոքի համաձայն` Սերգեյ Խաչատուրովին կալանքի տակ պահելը հակասում է օրենքին, որովհետև նրա գործողությունները, որոնք քննությունը «հանցավոր» է համարում, կատարվել են ձեռնարկատիրական գործունեության ոլորտում։ Գործարարը պնդում է, որ ինքն անմեղ է, բոլոր գործողությունները կատարվել են քաղաքացիաիրավական հարաբերությունների շրջանակում։