ԵՐԵՎԱՆ, 29 նոյեմբերի — Sputnik. Հայաստանի ԱԳՆ ղեկավարի պաշտոնակատար Զոհրաբ Մնացականյանը կարծում է, որ ՀԱՊԿ նոր գլխավոր քարտուղարի նշանակման հարցը փորձաքար չի դառնա կազմակերպության անդամ երկրների նեղ համագործակցության համար։
Այդ մասին նա ասել է ռուս լրագրողների խմբի հետ զրույցում, հաղորդում է ՌԻԱ Նովոստին։
«Այդ հարցը փորձաքար չի եղել և չի լինի կազմակերպության անդամ երկրների նեղ համագործակցության մեջ մեր կոլեկտիվ համագործակցության ապահովման առումով», – ասել է Մնացականյանը։
Միաժամանակ նա վստահություն է հայտնել, որ ՀԱՊԿ անդամ երկրները կարող են լուծել կազմակերպության գլխավոր քարտուղարի նշանակման հարցը փոխզիջման հիման վրա։
Հիշեցնենք, որ Մարտի 1–ի գործով Հայաստանում հարուցված քրեական գործի հետևանքով ՀԱՊԿ գլխավոր քարտուղար Յուրի Խաչատուրովը հետ է կանչվել պաշտոնից:
Նոր գլխավոր քարտուղարի նշանակման վերաբերյալ որոշում պիտի կայացվի դեկտեմբերի 6–ին Սանկտ Պետերբուրգում կայանալիք ՀԱՊԿ գագաթնաժողովի ժամանակ: