ԵՐԵՎԱՆ, 28 նոյեմբերի — Sputnik. ՌԴ առաջնորդ Վլադիմիր Պուտինը կարծում է, որ Ռուսաստանի տարածքային ջրեր ուկրաինական նավերի ներխուժման հետ կապված վտանգավոր իրավիճակը ստեղծել են Կիևի իշխանությունները։
«Նախօրոք մտածված սադրանքի ակնհայտ նշաններ, որպեսզի հետո, դրանից օգտվելով, երկրում ռազմական դրություն ներմուծելու պատրվակ ունենան։ Դա ոչ մի կապ չունի Ռուսաստանի և Ուկրաինայի հարաբերությունները կարգավորելու փորձերի հետ», –ՌԻԱ Նովոստին մեջբերում է ՌԴ նախագահի խոսքերը «Ռուսաստանը կանչում է» համաժողովից։
Պուտինը վստահ է, որ Պյոտր Պորոշենկոն փորձում է գնալ իրավիճակի սրման Ուկրաինայում նախագահական ընտրությունների շեմին։
Նա հատուկ ընդգծել է, որ ուկրաինացի նավաստիները մտել են այն ռուսական ջրային տարածքները, որոնք ռուսական են եղել նաև մինչև Ղրիմի միացումը։
Նա նաև խոսել է ռուս սահմանապահների պրոֆեսիոնալ պահվածքի մասին։
«Իսկ ինչպե՞ս պետք է իրենց պահեին սահմանապահները։ Ռազմական նավերը ներխուժել են ՌԴ տարածքային ջրեր և չեն պատասխանում արձագանքին, հասկանալի չէ, թե դրանք ինչ են պատրաստվում անել։ Եթե սահմանապահներն այդպես չվարվեին, նրանց բոլորին դատի կտային։ Նրանք կատարել են իրենց ռազմական պարտքը, հրամանը», – հավելել է Պուտինը։
ՌԴ նախագահը հայտարարել է նաև, որ Կիևի իշխանությունները «հաջողությամբ վաճառում են հակառուսական տրամադրությունները», որովհետև այլևս վաճառելու բան չունեն։ «Եվ նրանք ամեն ինչ մարսում են։ Եթե նրանք նախաճաշին նորածին ուզեն ուտել, նրանց նորածին էլ կմատուցեն», – ասել է Պուտինը։
Նոյեմբերի 25-ին ռուս սահմանապահները Սև ծովում երեք ուկրաինական ռազմանավ են բռնել։ ԱԴԾ տվյալների համաձայն` կոնֆլիկտի արդյունքում երեք (Կիևի տվյալներով` 6) ուկրաինացի զինվորական է տուժել։ Ուկրաինան նոյեմբերի 26-ի միջադեպով պայմանավորված` ռազմական դրություն է մտցրել երկրում։