Բոզոյանը նշում է, որ այս ընտրարշավում փողի գործոնը քիչ է լինելու, մեծ է լինելու խոսքի գործոնը։
Քաղաքագետը վստահ է, որ քարոզարշավի ընթացքում գաղափարական մոտեցումեր չեն լինի, որովհետև ընտրարշավը շատ կարճ է։
«Բացի այդ, այս փուլում գաղափարական լուրջ վեճերի մասին խոսելն անիմաստ է։ Պարզապես ամեն քաղաքական ուժ իր մարտավարությունն է ընտրել, թե ինչ պետք է ասի, որպեսզի կարողանա մաքսիմալ իր շուրջը կոնսոլիդացնել ընտրազանգվածին։ «Իմ քայլը» դաշինքը, ի տարբերություն Երևանի ավագանու ընտրության, երբ քաղաքական ուժերին բաժանեց «սև ու սպիտակի», իրեն «սպիտակ» հայտարարելով` մնացածին «սև» հայտարարեց, այս փուլում փորձելու է միայն «սև» հայտարարել ՀՀԿ–ին։ Այսինքն` մասնակի է անում այդ բաժանումը, քանզի շատ լավ հասկանում է, որ եթե մյուսներին էլ անվանի «սև», ապա ըստ էության, բացասական վերաբերմունքի կարժանանա բոլորի կողմից»,– ասում է նա։
Ըստ Բոզոյանի` հասկանալով այդ հանգամանքը` «Իմ քայլը» նախընտրական արշավը սկսել է ՀՀԿ–ին հակադրվելով, փորձելով այս վեց–յոթ ամիսների ընթացքում գրանցված պրոբլեմներն արդարացնել նախկին իշխանության սխալներով։
«Նույնը կարելի է ասել ՀՀԿ–ի մասին։ ՀՀԿ–ն փորձելու է այս վեց ամիսների պրոբլեմները բարդել Փաշինյանի վրա, համեմատականներ տանել իրենց իշխանության ժամանակահատվածի և այսօրվա իրավիճակի միջև` այդ համեմատականի մեջ ցույց տալով, որ այսօր ավելի վատ վիճակ է, քան նախկինում»,– ասում է քաղաքագետը։
Նրա խոսքով` ՀՀԿ–ն փորձելու է ցույց տալ Փաշինյանի խոսքի և գործի տարբերությունը, որովհետև նախկինում նա այլ խոստումներ էր տվել, իսկ այսօր 180 աստիճանով այլ տեսակետներ է հայտնում։