ԵՐԵՎԱՆ, 26 նոյեմբերի — Sputnik. ՀՀԿ–ն արտահերթ խորհրդարանական ընտրությունների քարոզարշավն այսօր մեկնարկեց կուսակցության կենտրոնական գրասենյակից, որտեղ նախընտրական ցուցակի 2-րդ համարը զբաղեցնող Արփինե Հովհաննիսյանն ու 5-րդ համարը զբաղեցնող Արման Աշոտյանը ներկայացրեցին կուսակցության նախընտրական ծրագիրն ու կարգախոսը։
Անդրադառնալով «Եթե մտահոգ ես, ընտրիր Հանրապետականին» կարգախոսին` Արմեն Աշոտյանը մեկնաբանեց, թե ինչով են մտահոգ հանրապետականներն ու ինչով պետք է մտահոգ լինեն իրենց ձայն տվող քաղաքացիները։
«Մենք վստահ ենք, որ ՀՀ քաղաքացին մտահոգ պետք է լինի Հայաստանի անվտանգությամբ, մտահոգ պետք է լինի Արցախի ճակատագրով, մտահոգ պետք է լինի բանակի մարտունակությամբ, սահմանների ամրությամբ, նոր թանկացումներով, սոցիալական խնդիրներով, աշխատանքը կորցնելու վտանգով, ավանդական արժեքների այլասերմամբ»,– ասաց Աշոտյանը։
Ինչո՞ւ ընտրել Հանրապետականին հարցի պատասխանը ՀՀԿ փոխնախագահը հակիրճ ձևակերպեց. «Որովհետև մենք ունենք գիտելիք, պատմություն, փորձ, որովհետև մենք ընդունել ենք մեր սխալները, որովհետև մենք պատրաս ենք ծառայել հայրենիքին»։
Իսկ քարոզչանյութերի սև ու սպիտակ ձևավորումը, Աշոտյանի խոսքով, Հանրապետականի համար զուտ դիզայներական լուծում չէ, այլ ունի գաղափարական հիմք։
«Հայաստանին այս 6-7 ամիսների ընթացքում պարտադրվել է սև ու սպիտակ իրականություն։ Ամեն ինչ կա՛մ լավ է, կա՛մ վատ է, ինչ որ երեկ էր` սև էր, ինչ որ այսօր է` սպիտակ է, իրենք լավն են, մենք վատը, իրենք հրեշտակներ են, մենք դեմոններ։ Բայց դա չէ իրականությունը, իրականությունը շատ ավելի բազմերանգ է ու բազմաշերտ»,– ասաց Աշոտյանը։
Իսկ սև ու սպիտակ իրականության ՀՀԿ–ի առաջարկած գունավոր լուծումները, ինչպես ներկայացրեց ՀՀԿ փոխնախագահը, սև ու սպիտակ շապիկով նախընտրական ծրագրում ներկայացված են արդեն գունավոր` եռագույն ներդիրի տեսքով։
Հիշեցնենք` ՀՀ ԱԺ արտահերթ ընտրությունները կկայանան դեկտեմբորի 9–ին։