ԵՐԵՎԱՆ, 26 նոյեմբերի – Sputnik. Երևան քաղաքի Աճառյան փողոցում՝ Բուսաբանական այգու մոտակայքում, ողբերգական ավտովթար է տեղի ունեցել։ Այս մասին հայտնում է Արտակարգ իրավիճակների նախարարության մամուլի ծառայությունը:
Նոյեմբերի 26-ին, ժամը 03:20-ին «911» ծառայությունն ահազանգ է ստացել, որ Երևան քաղաքի Աճառյան փողոցում՝ Բուսաբանական այգու մոտակայքում, տեղի է ունեցել ավտովթար, «Mercedes» մակնիշի ավտոմեքենան բախվել է կայանած վերամբարձ կռունկին, կան տուժածներ. անհրաժեշտ է փրկարարների օգնությունը:
Դեպքի վայր է մեկնել ԱԻՆ ՓԾ հրշեջ-փրկարարական ջոկատից երկու մարտական հաշվարկ, հատուկ նշանակության փրկարարական աշխատանքների իրականացման կենտրոնի փրկարարական ջոկատը և Ճգնաժամային կառավարման ազգային կենտրոնի արտակարգ իրավիճակների արձագանքման խումբը:
Պարզվել է, որ Աճառյան փողոցում՝ Բուսաբանական այգու մոտակայքում, «Mercedes-Benz E350» մակնիշի ավտոմեքենան (վարորդը՝ Գ. Հ.) բախվել է ճամփեզրին կայանած «ՄԱԶ» մակնիշի վերամբարձ կռունկին (վարորդը՝ Լ. Ա.):
Գ. Հ.-ն հոսպիտալացվել է «Սուրբ Գրիգոր Լուսավորիչ» ԲԿ, որտեղ բժիշկները տուժածի առողջական վիճակը գնահատել են կայուն ծանր:
Փրկարարները հատուկ տեխնիկայի օգնությամբ «Mercedes-Benz E350» մակնիշի ավտոմեքենայից դուրս են բերել երկու ուղևորի դի և մոտեցրել շտապօգնության ավտոմեքենային, այնուհետև հոսանքազրկել ավտոմեքենան: