ԵՐԵՎԱՆ, 26 նոյեմբերի — Sputnik. 9-րդ դասարանցիներն այս տարի «Հայոց լեզու» առարկայից կենտրոնական քննություն կհանձնեն ոչ թե իրենց դպրոցներում, այլ կենտրոնացված քննական կենտրոններում։ Այս մասին այսօր լրագրողների հետ հանդիպմանն ասաց Գնահատման և թեստավորման կենտրոնի տնօրենի տեղակալ Կարո Նասիբյանը։
«Հանրապետությունում ստեղծվելու են 250-ից ոչ պակաս քննական կենտրոններ` մայրաքաղաքում, մարզկենտրոններում, քաղաքներում, գյուղերում: Քննության կազմակերպիչները լինելու են ոչ տվյալ դպրոցի ուսուցիչները: Մենք ունենալու ենք հայոց լեզվի մասնագետների խմբեր՝ տեղում թեստերը ստուգելու համար»,- ասաց Նասիբյանը:
9-րդ դասարանի «Հայոց լեզվի» քննության մեկ փոփոխությամբ էլ նախկինում հանձնարարվող շարադրության փոխարեն այս տարի աշակերտները թեստային աշխատանք կկատարեն։
«Թեստը բաղկացած է լինելու 3 մասից՝ ընտրովի պատասխանով առաջադրանք, կարճ պատասխանով առաջադրանք, որտեղ աշակերտն ինքն է իր ձեռքով գրում պատասխանը և շարադրանքի մաս: Այստեղ ավանդական ազատ շարադրություն չի լինելու: Լինելու է տեքստ, և աշակերտն այդ տեքստի վերաբերյալ արտահայտելու է իր կարծիքը, գնահատելու է գործողությունները: Շարադրանքը լինելու է 50-70 բառի սահմաններում, 5-10 նախադասության շրջանակում: Գնահատման և թեստավորման կենտրոնի կայքում արդեն հրապարակվել է ուղեցույցը, որտեղ առկա է քննական թեստի նմուշը, բացատրությունը, գնահատման սանդղակը»,-ասաց Կարո Նասիբյանը:
«Հայոց լեզվի» կենտրոնացված քննությունը կանցկացվի 2019 թվականի մայիսի կեսերին։ Դրան կմասնակցեն 9-րդ դասարանի ավելի քան 31 300 աշակերտ:
Գնահատման և թեստավորման կենտրոնի տնօրենի տեղակալի խոսքով, քննարկվում է նաև 12-րդ դասարանի քննությունը կենտրոնացված քննական կենտրոններում անցկացնելու տարբերակը, բայց այս տարի դրանք դեռ կանցնեն նախկին կարգով։