ԵՐԵՎԱՆ, 25 նոյեմբերի –Sputnik. Ռուսական Սու-25 ռազմական ինքնաթիռները վերահսկում են Կերչի նեղուցում Ուկրաինայի ՌԾՈւ–ի գործողությունները, փոխանցում է ՌԻԱ Նովոստին։
Ավելի վաղ` առավոտյան 7:00–ի սահմաններում, ինչպես հայտնել են ՌԴ պաշտոնական աղբյուրները, «ուկրաինական երեք նավ խախտել էին Ռուսաստանի պետական սահմանը և ուղղություն վերցրել դեպի Կերչի նեղուց»։ Դրանից հետո Ուկրաինան մեղադրել էր Ռուսաստանին` նավաքարշ շոգենավը խոյահարելու մեջ, ինչի պատճառով վնասվել էր նավի հիմնական շարժիչը, կողվածքն ու շերտավոր պատվարը։
Ժամը 11:30–ին Բերդյանսկի նավահանգստից «Գյուրզա» դասի ևս երկու զրահապատ հրետանային նավեր շարժվեցին, սակայն ռուսական ռազմանավերն ու չորաբեռների նավերը փակեցին հասանելիությունը դեպի նեղուց։
Ղրիմի ղեկավար Սերգեյ Աքսյոնովը հայտարարել է, որ «Սև ծովում ուկրաինական նավերի սադրանքի հետևում կիևյան ռեժիմի արևմտյան տերերն են կանգնած»։
«Պատահական չէ, որ եվրոպացի և ամերիկացի քաղաքական գործիչները վերջին ամիսներին մտահոգություն էին հայտնում Ազովի ծովում առկա իրավիճակի մասին։ Ուկրաինան, որպես ինքնիշխանությունից զրկված և արտաքին կառավարման տակ գտնվող երկիր, միջազգային լարվածությունը սրելու գործիք է», –Facebook–ի իր էջում գրել է Աքսյոնովը։
Միևնույն ժամանակ, նրա խոսքով, սահմանախախտ նավերի գործողությունների համար պատասխանատվություն է կրում նախևառաջ Կիևը։
«Այս գործողությունների արդյունքում կտուժեն Ուկրաինայի շահերը, ինչպես արդեն եղել է «Նորդ» նավի անձնակազմի վրա ծովահենների հարձակումից հետո», – ավելացրել է Աքսյոնովը։
Ազովի ծովում նավագնացության հետ կապված խնդիրներ են առաջ եկել տարեսկզբին։ Ուկրաինան մարտին կանգնեցրել է «Նորդ» ձկնորսանավը, որի վրա 10 ռուս կար, իսկ մի քանի ամիս անց, օգոստոսին Խերսոն քաղաքի նավահանգստում արգելափակվել էր ռուսական «Մեխանիկ Պոգոդին» նավը։ Մոսկվան Կիևի իշխանությունների գործողությունները գնահատել էր որպես «ծովային ահաբեկչություն» և ի պատասխան ուժեղացրել Ազովի ծովի իր հատվածում գտնվող սահմանային վերահսկումը։ Այն ժամանակ Կիևը մեղադրեց Մոսկվային «նավերի զննության խիստ քաղաքականության մեջ»։