ԵՐԵՎԱՆ, 25 նոյեմբերի — Sputnik, Արմենուհի Մխոյան. Գյումրու Վարդան Աճեմյանի անվան պետական դրամատիկական թատրոնն անակնկալ է պատրաստել հանդիսատեսին՝ նոր ներկայացում՝ հետաքրքիր տեխնիկական լուծումներով ու նոր ձևաչափով: Նորարարությունն ու դերասանական խաղը դիտելու էին եկել նաև հյուրեր Երևանից, նրանց թվում` ՀՀ մշակույթի նախարարի պաշտոնակատար Լիլիթ Մակունցը, Երևանի փոխքաղաքապետը Տիգրան Վիրաբյանը ու Երևանի գլխավոր ճարտարապետ Արթուր Մեսչյանը:
Այս անգամ Գյումրու թատրոնը հանդիսատեսի դատին ներկայացրեց հրավիրված ռեժիսորի՝ Հրաչ Քեշիշյանի կողմից բեմադրված Ջոն Օսբորնի «Ոչինչ չի մնա» հոգեբանական դրաման:
Հրաչ Քեշիշյանը, ում համար սա մեծ բեմում արված առաջին բեմադրությունն է, ընդգծեց, որ Գյումրիում ներկայացում բեմադրելու հրավերը սրտի թրթիռով ու ուրախությամբ է ընդունել՝ հուսով, որ այն երկար կմնա թատրոնի խաղացանկում։ «Ուրախ եմ և տպավորված: Սա իմ կյանքում եզակի դեպքերից է որպես ռեժիսոր՝ ինձ զգում եմ ջերմությամբ պարուրված: Ամեն ինչ այնպես է, ինչպես Հոլիվուդում: Ամեն ինչ անում ենք, որ ներկայացումը կայանա և՛ տեխնիկապես, և՛ զգայական առումով»,- Sputnik Արմենիային առաջնախաղից առաջ ասաց Հրաչ Քեշիշյանը:
Անդրադառնալով 2007թ.-ին Օսբորնի «Ետ նայիր զայրացած» պիեսի հիման վրա նկարահանված «Ոչինչ չի մնա» ֆիլմի բեմական տարբերակին՝ Հրաչ Քեշիշյանը նկատեց՝ ներկայացումը տարբերվում է իր բարդ հոգեբանական իրավիճակների, դերասանական խաղի և տեխնիկական մոտեցումների շնորհիվ. «Զուգահեռներ անցկացնելով ֆիլմի և ներկայացման միջև՝ պետք է նշեմ, որ տեխնիկապես բարդ ներկայացում է ստացվել, որտեղ, բացի բեմում գտնվող 4 հիմնական դերակատարներից, ետնաբեմում աշխատում է սպասարկող մեծ թիմ։ Ի տարբերություն ֆիլմի, ներկայացման մեջ հերոսներն ավելի երիտասարդ են»:
«Ոչինչ չի մնա» կինոպիեսի բեմադրությունը մուլտիմեդիա ներկայացում է, որտեղ որոշակի տեսարաններ նախօրոք նկարահանված են և վերարտադրվում են հերոսների հիշողությունների փոխարեն։ Մուլտիմեդիա հնարքներով հերոսների մտքերը լուսագրվում են և ապա ինտերակտիվ կառավարվում տարածության մեջ։ Տարբեր տեսարաններում և անցումներում օգտագործվում են հատուկ գրաֆիկական լուծումներ։
Բեմադրության նկարչական ձևավորումը Գարեգին Եվանգուլյանին է, իսկ երաժշտության հեղինակն է Հայկոն: «Շատ ուրախ եմ, որ հենց այս նախագծի վրա ենք աշխատել Հրաչ Քեշիշյանի հետ: «Ոչինչ չի մնան» մեր լավագույն ֆիլմերից է եղել, իսկ այսօր արդեն բեմադրության տեսքով է: Երաժշտական մոտիվը մնացել է նույնը, բայց ամբողջովին նոր գործիքավորումներ են արվել »,-ասաց Հայկոն:
Հոգեբանական դրամայի մեջ զբաղված են երիտասարդ դերասաններ Արսեն Միքայելյանը, Մանե Մխոյանը, Ջեմմա Ադամյանը և Ներսես Ավետիսյանը:
«Վստահ եմ, որ այս ներկայացումը անշլագ է լինելու՝ ունենալու է շատ մեծ հանդիսատես: Հետաքրքիր ներկայացում է ու նոր թարմ շունչ հայկական թատրոնում: Դերասանական խաղը, դեկորները` ամեն ինչը շատ լավ է արված»,- Sputnik Արմենիայի հետ կիսելով իր տպավորությունները` նշեց ՀՀ մշակույթի նախարարի պաշտոնակատար Լիլիթ Մակունցը:
Այն, որ ներկայացումը ոչ միայն ստացված էր, այլ նաև կունենա երկար ընթացքը, վկայում էին ներկայացման ավարտի հանդիսատեսի հոտնկայս երկար ծափերն ու ջերմ ընդունելությունը:
Ի դեպ, ստեղծագործական թիմը նոյեմբերի 24–ի և 25-ի առաջնախաղերը նվիրում է հայտնի կինոօպերատոր, արցախյան պատերազմի վավերագիր Արթուր Ապրեսովի հիշատակին: