ԵՐԵՎԱՆ, 24 նոյեմբերի — Sputnik. Ընտրություններից հետո համաձայնության կառավարություն ձևավորելու իմաստ չկա: Այսօր` նոյեմբերի 24-ին, Երևանի փողոցներում ընթացող քայլերթի ժամանակ լրագրողներին ասեց ՀՀ վարչապետի պաշտոնակատար Նիկոլ Փաշինյանը:
«Ի՞նչ իմաստ ունի համաձայնության կառավարությունը, պետք է լինի ժողովրդի ուժեղ մանդատով հստակ օժտված կառավարություն»,– ասաց նա։
Լրագրողները հետաքրքրվեցին` իսկ խորհրդարանական ընտրություններից հետո կառավարության կազմում փոփոխություններ կլինե՞ն, թե՞ ոչ։
«Կլինեն ընտրությունները, կտեսնենք: Ամեն ինչ կքննարկենք, չեմ կարող ասել` կլինեն, չեմ կարող ասել, որ չեն լինի»,- ասաց նա։
Այդուհանդերձ, վարչապետի պաշտոնակատարը նշեց, որ կառավարության առանցքային պորտֆելների մասով ընտրություններից հետո փոփոխություններ չեն լինի։
Լրագրողների ճշտող հարցին՝ այսինքն Զոհրաբ Մնացականյանն ու Դավիթ Տոնոյանը պահելո՞ւ են իրենց պորտֆելները, վարչապետի պաշտոնակատարը պատասխանեց՝ այո։
Անդրադառնալով «Սասնա ծռեր» կուսակցության ներկայացուցիչ Ժիրայր Սեֆիլյանի դիտարկմանը, թե նոր խորհրդարանը 1-1,5 տարվա կյանք է ունենալու, քանի երկրում հիմնական փոփոխություններ չեն կատարվել, Ընտրական օրենսգիրքը չի փոխվել, Սերժ Սարգսյանն ու Ռոբերտ Քոչարյանը չեն հեռացվել քաղաքականությունից, Փաշինյանն ասաց. «Խորհրդարանն ընտրվում է ամբողջ ժամկետով գործելու համար, ոչ մեկը չի կարող ժողովրդի փոխարեն որոշել»։
Իսկ ՀՀԿ թեկնածու, համամասնական ցուցակի երրորդ հորիզոնականը զբաղեցնող Դավիթ Շահնազարյանի դիտարկմանն էլ, թե Փաշինյանը մտադիր է տապալել առաջիկա ընտրությունները, վարչապետի պաշտոնակատարը հակադարձեց`Դավիթ Շահնազարյանի ու ՀՀԿ–ի համար ընտրությունները վաղուց են տապալված։
Ազգային ժողովի արտահերթ ընտրությունները կկայանան դեկտեմբերի 9-ին։ Քարոզարշավը կմեկնարկի նոյեմբերի 26-ին, կավարտվի դեկտեմբերի 7-ին։