ԵՐԵՎԱՆ, 23 նոյեմբերի — Sputnik. Նիկոլ Փաշինյանը ՀՀ վարչապետի ֆոնդից «Հայաստան» համահայկական հիմնադրամին է նվիրաբերել 1 մլն, իսկ իր անձնական միջոցներից՝ 500 հազար դրամ:
Այս մասին տեղեկացնում է ՀՀ կառավարության մամուլի ծառայությունը` նշելով, որ «Հայաստան» համահայկական հիմնադրամի ամենամյա՝ 21-րդ հեռուստամարաթոնի շրջանակում վարչապետի պաշտոնակատար Նիկոլ Փաշինյանը նոյեմբերի 23-ի առավոտյան է այցելել հիմնադրամի գրասենյակ:
Նիկոլ Փաշինյանն ուղիղ եթերում շնորհակալություն է հայտնել բոլոր այն մարդկանց, ովքեր այս պահի դրությամբ արդեն մասնակցել են հեռուստամարաթոնին և իրենց նվիրատվությունն են արել «Հայաստան» համահայկական հիմնադրամին:
«Ցանկանում եմ հույս հայտնել, որ մնացած մեկ ժամվա ընթացքում մեր բազմաթիվ հայրենակիցներ կհասցնեն իրենց նվիրատվությունն անել հիմնադրամին, որովհետև այդ գումարները ծախսվելու են Արցախի Հանրապետության, Հայաստանի Հանրապետության կարևոր ենթակառուցվածքների բարելավման և զարգացման ծրագրերի համար:
Սիրելի հայրենակիցներ, այս նոր ժամանակաշրջանը չափազանց կարևոր է և մեր համազգային խնդիրների լուծման համար մեզ անհրաժեշտ է համազգային բացառիկ համախմբում: Իհարկե, հեռուստամարաթոնն այդ համախմբման ձևերից մեկն է և մենք այս ճանապարհով դեռ պետք է գնանք, որպեսզի հասնենք համախմբման և միասնության այն մակարդակի, որը երկար տարիներ երազել ենք»,–ասել է վարչապետի պաշտոնակատարը:
Փաշինյանը ընդգծել է, որ կասկած չկա, որ ստեղծելու ենք իսկապես միասնական, ազատ և երջանիկ Հայաստան: