ԵՐԵՎԱՆ, 23 նոյեմբերի — Sputnik. Բնապահպանության նախարարի պաշտոնակատար Էրիկ Գրիգորյանի՝ լրատվամիջոցների և հասարակական կազմակերպությունների հետ այսօրվա հանդիպման ավարտին նախարարության միջանցքում մեծ իրարանցում բարձրացավ:
Հայկական բնապահպանական ճակատի (ՀԲՃ) անդամները բարձրաձայն բողոքելով մտան նախարարության տարածք՝ հանդիպում պահանջելով Էրիկ Գրիգորյանի հետ: Նրանց խոսքով` շենքը պահպանող ոստիկաններն իրենց թույլ չեն տվել ներս մտնել ու մասնակցել ասուլիսին, իսկ նախարարության աշխատակիցները չեն փորձել լուծել խնդիրը:
ՀԲՃ անդամ Անի Խաչատրյանը հայտարարեց, որ իրենք շատ հարցեր ունեին նախարարի պաշտոնակատարին, ու այժմ պահանջում են, որ նախարարն ընդունի իրենց ու այդ հանդիպումը հեռարձակվի ֆեյսբուքյան ուղիղ եթերով:
Բնապահպանության նախարարության տեղեկատվության և հասարակայնության հետ կապերի վարչության պետ Արմեն Վարդանյանը, նախարարի աշխատասենյակից դուրս գալով, հայտնեց, որ նախարարը պատրաստ է ընդունել ասուլիսից բացակայած խմբին, բայց պայմանով, որ հանդիպումը չի հեռարձակվի ու չի էլ տեսանկարահանվի: Դրանից հետո բնապահպանները հրաժարվեցին նախարարի պաշտոնակատարի հետ հանդիպել, բայց վարչության պետին փոխանցեցին իրենց հետ բերած «նվերները»:
«Սա Դեբեդ գետից վերցրած տիղմն է, նստվածքը, որը լցվել է գետը Թեղուտի ու Ախթալայի հանքերից»,- ուսապարկից հանելով գորշ նյութով լցված ապակե տարան՝ ասաց Անի Խաչատրյանը:
Հետո նա ուսապարկից հանեց դեղնավուն հեղուկով լցված մի շիշ ու ասաց. «Իսկ սա Տանձուտի հանքավայրից վերցրած ջուրն է՝ թթվային դրենաժը: Այս հանքը շահագործվել է 100 տարի առաջ ու 100 տարի այլևս չի շահագործվում»:
Բնապահպանները հայտարարեցին, որ «նվերները» պատահական չեն ընտրված: Նրանք ուզում են զգուշացնել, որ Ամուլսարի հանքի շահագործման արդյունքում թթվային դրենաժի հետևանքը հարյուրապատիկ շատ է լինելու և ավելի երկար ժամանակ է շարունակվելու:
Ամուլսարի ոսկու հանքը պաշարների առումով Հայաստանի երկրորդ հանքավայրն է։ Հանքավայրը շահագործելու համար արտոնագիր է ստացել Հայաստանում Lydian International դուստր ընկերություն` GeoTeam-ը, որը ավելի ուշ վերանվանվել է Lydian Armenia-ի։ Ամուլսարի լեռնագագաթը գտնվում է Վայոց Ձորի և Սյունիքի մարզերի սահմանագլխին՝ Ջերմուկ քաղաքից 10 կմ հեռավորության վրա:
Հանքավայրի շինարարության պաշտոնական մեկնարկը տրվել է 2016թ-ի օգոստոսի 19-ին: Ամուլսարը Հայաստանում այս պահին ամենախոշոր միջազգային ներդրումն է: Այն իրականացվել է Միջազգային ֆինանսական կորպորացիան (IFC) և Վերակառուցման ու զարգացման եվրոպական բանկի չափանիշներին համապատասխան, բնապահպանական և սոցիալական ազդեցությունների գնահատմամբ: Հանքի շահագործումը Հայաստանում իշխանափոխությունից հետո դադարեցվել է, հարուցվել է նաև քրեական գործ` չարաշահումների և բնապահպանական օրենսդրության խախտումների փաստով։ Կառավարության հրավերով հանքի տարածքում նախատեսվում է նոր միջազգային բնապահպանական փորձաքննություն իրականացնել։ ՀՀ վարչապետի պաշտոնակատար Նիկոլ Փաշինյանը հայտարարել է, որ հանքը չի շահագործվի, քանի դեռ փոչձաքննույունը դրական եզրակացություն չի տվել։