ԵՐԵՎԱՆ, 22 նոյեմբերի — Sputnik. Էլեկտրաէներգիայի սակագինը հնարավոր է իջեցնել ոչ թե 5, այլ 10 դրամով։ Sputnik Արմենիայի հետ զրույցում, հակադարձելով ԱԺ քննիչ հանձնաժողովի նախագահ Միքայել Մելքումյանի հայտարարությանը, ասաց Էներգետիկ ոլորտի փորձագետ, ՀՀ վարչապետին կից սակագների հավաստիությունն ուսումնասիրող աշխատանքային խմբի անդամ Էդվարդ Արզումանյանը։
«Եթե պարոն Մելքումյանն ասում է, որ իրենց հանձնաժողովի կարծիքով սակագինը հնարավոր է իջեցնել ամենաքիչը 5 դրամով, մենք ասում ենք`ոչ թե 5, այլ 10-ը։ Բայց եթե իրենք այդպես են պնդում, եկեք որպես առաջին քայլ հիմա իջեցնենք 5 դրամով, իսկ հետագայում` 1-2 ամիս հետո, երբ պարզ կլինի գազի սակագնի ճակատագիրը, սահմանին ՌԴ–ի կողմից սակագնի վերանայման հարցը, հնարավոր կդառնա էլեկտրաէներգիայի սակագինը նվազեցնել ևս 5 դրամով»,– ասաց Արզումանյանը։
Ինչ վերաբերում է գազի գնին, փորձագետի համոզմամբ, միայն ՀՀ տարածքում այն հնարավոր է նվազեցնել շուրջ 10 տոկոսով, ինչը ավտոմատ կերպով կհանգեցնի նաև էլեկտրաէներգիայի սակագնի էժանացմանը։
«Էլեկտրաէներգիայի սակագնի հաշվեկշռում գազով աշխատող ջերմային էլեկտրակայանների արտադրած էլեկտրաէներգիայի չափաբաժինը կազմում է 34-35 տոկոս։ Այսինքն` մենք, գազի սակագնում ունենալով 5-10 տոկոս իջեցում, կարող ենք ունենալ էլեկտրաէներգիայի սակագնի առնվազն 1-2 դրամով էժանացում»,– ասաց նա։
Գազի գնի վրա, նրա խոսքով, կարող է ազդել նաև տեխնիկական կորուստների նվազեցումը, որոնք փորձագետի դիտարկմամբ, ուռճացված են ներկայացված, նկարված են, իսկ 20 տարի առաջ մշակված դրանց հաշվարկման մեխանիզմն այսօրվա իրականության հետ ոչ մի աղերս չունի։
Այդուհանդերձ, այս բոլոր ուսումնասիրություններն ու հաշվարկները բացառապես Էդուարդ Արզումանյանի անհատական հաշվարկներն են։ Իսկ սակագների հավաստիությունն ուսումնասիրող վարչապետին կից աշխատանքային խումբն այս հարցերի շուրջ առայժմ որևէ որոշում չունի։ Ըստ Արզումանյանի` ժամանակ չկա, բոլորը զբաղված են քարոզարշավով։ Փորձագետը հույս ունի, որ ընտրություններից հետո, ավելի հանգիստ մթնոլորտում աշխատանքային խումբը կհասնի էլեկտրաէներգիայի սակագինը 10 դրամով նվազեցնելու որոշմանը։ Իսկ, քանի դեռ նման որոշում չկա, Էդուարդ Արզումանյանը համաձայն է նաև ԱԺ հանձնաժողովի նախագահ Միքայել Մելքումյանի առաջարկած 5 դրամին։
Սեպտեմբերի 24-ին ՀՀ վարչապետ Նիկոլ Փաշինյանի որոշմամբ աշխատանքային խումբ էր ստեղծվել՝ գազի գնի ձեւավորման վրա ազդեցություն ունեցող բաղադրիչների ուսումնասիրության համար:
8 հոգանոց աշխատանքային խումբը ղեկավարում է փոխվարչապետ Մհեր Գրիգորյանը։ Խմբում ներգրավված են նաև ՀՀ էներգետիկ ենթակառուցվածքների եւ բնական պաշարների նախարարը, փոխնախարարը, վարչապետի գլխավոր խորհրդականն ու Հանրային ծառայությունները կարգավորող հանձնաժողովի ներկայացուցիչը։ Խմբի աշխատանքներին մասնակցում են նաև «Գազպրոմ Արմենիայի» ներկայացուցիչները։
«Գազպրոմի» հետ ունեցած պայմանագրով, նրա` Հայաստանում գործող դուստր կազմակերպությունը` «Գազպրոմ Արմենիան», 1000 խմ գազի դիմաց սահմանին վճարում է 150 դոլար։
Հայաստանի շարքային սպառողը գազի դիմաց վճարում է մոտ 290 դոլարին համարժեք դրամ, ոչ ապահով խավերը` 80 դոլարին, 10 000 խմ-ից շատ սպառող խոշոր բաժանորդները վճարում են 242 դոլարին, իսկ ջերմոցային ու վերամշակող ընկերությունները` 212 դոլարին համարժեք դրամ։
Էլեկտրաէներգիայի ցերեկային սակագինը շարքային սպառողների համար 44.98 դրամ է, գիշերայինը` 34.98 դրամ։
2018թ-ի հուլիսի 1-ից Հայաստանի սոցիալապես անապահով ընտանիքների համար ՀԷՑ-ը սահմանել է ցերեկային` 40 և գիշերային` 30 դրամ սակագին: