ԵՐԵՎԱՆ, 21 նոյեմբերի — Sputnik. Ազգային ժողովի առաջիկա ընտրությունը կտարբերվի նախևառաջ ձայների կեղծման, ընտրողներին կաշառելու պրակտիկայի բացակայությամբ և համամասնական ցուցակների թարմացմամբ ու երիտասարդացմամբ։ Այսօր լրագրողների հետ զրույցում այս կարծիքը հայտնեց քաղտեխնոլոգ Կարեն Քոչարյանը։ Նույնիսկ այն ուժերը, որոնք սովորաբար ասոցացվում էին օլիգարխիկ կապիտալի հետ, այսօր ցուցակներ են ներկայացրել, որոնցում գերազանցապես ընդգրկված են հասարակ քաղաքացիները։
«Իրավիճակն ինչ–որ չափով հիշեցնում է ՀՀ Գերագույն խորհրդի 1990 թվականի ընտրությունը, որին կարող էին մասնակցել բոլոր ցանկացողները, և հսկայական ֆինանսական ռեսուրսների առկայությունը պարտադիր պայման չէր։ Իրավիճակն այսօր իսկապես բացառիկ է», – նշեց Քոչարյանը։
Փորձագետը չի կասկածում, որ Նիկոլ Փաշինյանի «Իմ քայլը» դաշինքը խորհրդարանական ընտրության ժամանակ մրցակիցներին կհաղթի ձայների մեծ տարբերությամբ։ Ինտրիգն այլ է` ո՞վ կլինի երկրորդը։ Վերջին տարիներին ընտրություններում նախապես կանխորոշված էր ինչպես առաջին, այնպես էլ երկրորդ տեղը։ Այսօր նախապես պատրաստի սցենար չկա հայտնի պատճառներով, և քաղաքական ուժերի նախընտրական քարոզարշավի որակից շատ բան է կախված։
Փորձագետի կարծիքով` երկրորդ տեղին հավակնում են ՀՀԿ–ն, ԲՀԿ–ն, «Մենք» դաշինքը և «Սասնա ծռերը»` որոշակի վերապահումով։ Վերջինի հետ կապված շատ բան կախված է նրանից, թե համախոհների որ մասն այս ընթացքում կփոխի իր կողմնորոշումը դեպի Նիկոլ Փաշինյանի դաշինք։ Այդ հարցին հիմա շատ դժվար է պատասխանել։ «Սասնա ծռերի» օգտին, որը, ինչպես հայտնի է, ձևավորվել է երկու տարի առաջ ոստիկանության ՊՊԾ գունդը գրաված նույնանուն զինված խմբի հիման վրա, կքվեարկի հասարակության` առավել արմատական տրամադրվածություն ունեցող շերտը։ Եվ եթե այսօր նրանք Փաշինյանին շատ զգուշորեն են քննադատում, փոքր չափաբաժիններով, ապա հետագայում,անկախ նրանից` «Սասնա ծռերը» անցնեն ԱԺ, թե ոչ, քննադատության աստիճանը կմեծանա։
Առաջիկա նախընտրական քարոզարշավի ընթացքում, Քոչարյանի խոսքով, հետևյալ սխեման է գործելու` ՀՀԿ–ն «քլնգելու» է Փաշինյանի դաշինքին, վերջինս խոսելու է առաջիկա ծրագրերի և խնդիրների մասին, իսկ մյուսները քննադատելու են հանրապետականներին։ ՀՀԿ–ի դեպքում մի հետաքրքիր պահ կա. նրանք մեղադրում են մրցակիցներին (նույն ԲՀԿ–ին, «Լուսավոր Հայաստանին») կոնֆորմիզմում` իշխանության նկատմամբ լոյալ դիրքորոշման համար։ Քննադատության հասցեատերերն իրենց կառուցողական ընդդիմություն են համարում, ինչի հետ համաձայն չեն հանրապետականները։ «Սակայն, չգիտես ինչու, նրանք մոռանում են, որ ՀՀԿ–ն իր կառավարման ժամանակաշրջանում այդ ուժերին «կառուցողական ընդդիմություն» էր համարում»,– ասում է քաղտեխնոլոգը։ Հասկանալի չէ` ինչու են նրանք հիմա քննադատում այդ նույն «կառուցողական ընդդիմությանը» ։
Իշխանության նախկին կուսակցությունը, ինչպես նախկինում, այնպես էլ հիմա ունի իր սոցիալական բազան, կան նաև նոր իշխանությունից դժգոհ մարդիկ, և հանրապետականների խնդիրը այդ ձայների ակումուլյացիան է, այդ կապիտալի մոբիլիզացիան։