ԵՐԵՎԱՆ, 21 նոյեմբերի — Sputnik. 2018թ–ի բյուջեի դեֆիցիտը ծածկելու համար կառավարությունն Ասիական զարգացման բանկից 50 մլն ԱՄՆ դոլարի վարկ է վերցնում։ Այս մասին այսօր ԱԺ–ում վարկային համաձայնագրի քննարկման ժամանակ հայտնեց ՀՀ ֆինանսների նախարարի տեղակալ Արմեն Հայրապետյանը։
Նա իր ելույթում հայտնեց, որ վարկի առաջին 3 տարին լինելու են արտոնյալ։ Վարկի վերադարձը սկսվելու է 2021թ–ից։
«Մենք ունենք վարկային միջոցներից հրաժարվելու քաղաքականություն, բայց դա տեղի կունենա միայն մեր սեփական եկամուտների բարձրացման արդյունքում, երբ մեր ծախսերն ամբողջությամբ հնարավոր կլինի ապահովել մեր սեփական միջոցներով, ստացած եկամուտներով» ,– ասաց փոխնախարարը` արձագանքելով պատգամավորների դիտողությանը, թե նոր կառավարությունը խոստացել էր չավելացնել ՀՀ պետական պարտքը։
Հայրապետյանը շեշտեց, որ վարկը ներգրավվել է դեռ նախորդ իշխանությունների կողմից`2018թ–ի բյուջեի դեֆիցիտը լրացնելու համար։ Այն արդեն հաշվարկված է բյուջետային ընթացիկ տարվա ծախսերում, և ընդունվել է 2018թ–ի բյուջեի մասին օրենքով։ Սակայն վարկային համաձայնագիրը նոր է ներկայացվել ԱԺ։
2017 թվականի տվյալներով՝ Հայաստանի պետական պարտքը կազմում է ավելի քան 6,7 մլրդ դոլար։
Արտաքին պարտքի կառուցվածքում ԿԲ-ի պարտքը կազմում է 601.5 մլն, կառավարության պարտքը` 4.9 մլրդ դոլար: