ԵՐԵՎԱՆ, 20 նոյեմբերի — Sputnik. Հայաստանում նոյեմբերի 22–ից շրջանառության մեջ կդրվեն երրորդ սերնդի թղթադրամները։ Այդ մասին մամուլի ասուլիսում հայտարարեց ԿԲ աշխատակազմի ղեկավար Դավիթ Նահապետյանը։ Շրջանառության մեջ կդրվեն 10 հազար, 20 հազար և 50 հազար դրամանոց թղթադրամներ, իսկ դեկտեմբերի 25-ից` 1000, 2000 և 5000–դրամանոցները:
Նոր թղթադրամները նախկինից ամուր կլինեն։ Դրանք ներսից թղթից են, բայց դրսից պատված են պոլիէսթերի թելերով։
Ուստի դրանք կեղծելը, ինչպես նաև ճմռթելը ու կեղտոտելն ավելի դժվար կլինի։ Դրանք ավելի դիմացկուն են խոնավության նկատմամբ, օրինակ, դրանց վրա թափված սուրճը կարելի է սրբել։
Նոր թղթադրամներն ունեն մի քանի նոր պաշտպանիչ նշաններ` թղթադրամի վրա պատկերված անձնավորության դիմանկարի ուրվապատկերը, խորհրդանիշով կլոր պաշտպանիչ նշանը, զուգահեռ նախշերը, որոնք փոխվում են տարբեր անկյունների տակ։ Վերջապես, թղթադրամների վրա կլինեն շոշափելի նախշեր` թույլ տեսնողների համար։
«Ցանկանում եմ ընդգծել երկու կարևոր բան։ «Առաջին հերթին, հին թղթադրամները կարող են անժամկետ օգտագործվել այնքան ժամանակ, մինչև մաշվածության պատճառով դուրս չբերեն շրջանառությունից: Երկրորդ` սկզբնական շրջանում նոր թղթադրամներով հնարավոր չի լինի վճարումներ կատարել տերմինալներում, քանի որ որոշակի տեխնիկական և ծրագրային փոփոխություններ պետք է կատարվեն, բայց այդ խնդիրը շատ արագ կլուծվի», – հավելեց Նահապետյանը։
Նոր փողերը պատրաստվել են Գերմանիայում` Gieseke դրամահատարանում։ Դա այն դրամահատարաններից է, որն իրավունք ունի թողարկել եվրո։
Փորձը ցույց է տվել, որ բնակչությանն ինչ-որ միջին բան է պետք 1000 և 5000–դրամանոց թղթադրամների միջև։ Հիմա այդ ծանրաբեռնվածությունը կրում են 1000–դրամանոցները. այդ ծանրաբեռնվածությունը կնվազի։
Նրա խոսքով` այն, որ 1000 և 5000–դրամանոցի միջև իսկապես էլի թղթադրամներ են պետք, ցույց է տալիս նաև խորհրդային երեքռուբլիանոցների և երկուեվրոյանոցների փորձը։
Նոր 1000 դրամանոցը նվիրված է Պարույր Սևակին, 2000-դրամանոցը՝ շախմատիստ Տիգրան Պետրոսյանին, 5000-դրամանոցը՝ Վիլյամ Սարոյանին, 10 000-դրամանոցը՝ Կոմիտասին, 20 000-դրամանոցը՝ Հովհաննես Այվազովսկուն, 50 000-դրամանոցը՝ Գրիգոր Լուսավորչին: