ԵՐԵՎԱՆ, 20 նոյեմբերի — Sputnik. ՀԱՊԿ գլխավոր քարտուղարի անձը Նիկոլ Փաշինյանի համար երկրորդական ու նույնիսկ չորրորդական հարց է։ Այս մասին ՀՀ վարչապետի պաշտոնակատարն ասաց այսօր կառավարությունում հրավիրված ասուլիսի ժամանակ։
«ՀԱՊԿ գլխավոր քարտուղարի հարցը երկրորդական, երրորդական, անգամ չորրորդական հարց է։ Շատ ավելի կարևոր է Հայաստանի ստաձնած ու այդ կառույցի` Հայաստանի նկատմամբ ունեցած պարտավորույունների կատարման հարցը»,– ասաց նա։
Փաշինյանի խոսքով` գլխավոր քարտուղարի ընտրության շուրջ ստեղծված իրավիճակն առիթ է, որպեսզի պարզ դառնա առկա ավելի խորքային հարցերը։
«Այստեղ քննարկվում է Հայաստանի անվտանգությունը, այստեղ քննարկվում է Արցախի անվտանգությունը։ Եվ պետք է հստակ հասկանանք` այն, ինչ մենք անվանում ենք անվտանգության համակարգ, ինչ ակնկալիքներ ունենք մենք այդ համակարգից, ու ինչի է պատրաստ այդ համակարգը, ինչ ակնկալիքներ ունի այդ համակարգը մեզնից, մենք այդ ակնկալիքների որ մասն ենք պատրաստ իրականացնել, որը` ոչ»,– ասաց նա։
Հիշեցնենք, որ Մարտի 1–ի գործով Հայաստանում հարուցված քրեական գործի հետևանքով ՀԱՊԿ գլխավոր քարտուղար Յուրի Խաչատուրովը հեռացվել էր պաշտոնից: Նոր գլխավոր քարտուղարի նշանակման վերաբերյալ որոշումը կայացվելու է ավելի ուշ՝ Սանկտ Պետերբուրգում կայանալիք ՀԱՊԿ գագաթնաժողովի ժամանակ: