ԵՐԵՎԱՆ, 20 նոյեմբերի — Sputnik. Նիկոլ Փաշինյանի կառավարությունը չկարողացավ պահպանել տնտեսական ցուցանիշը, քանի որ այն հիմնված էր նկարված թվերի վրա։ Այսօր` նոյեմբերի 20-ին, լրագրողների հետ հանդիպմանը, անդրադառնալով տնտեսական ակտիվության ցուցանիշի անկման հարցին, ասաց ՀՀ վարչապետի պաշտոնակատար Նիկոլ Փաշինյանը։
«Ցուցանիշը կազմված էր բուքմեյքերական գրասենյակներում արված ստավկաներից, որը մեր ժողովրդի մի շատ զգալի մասին, այսպես ասած, տոկոսի տակ է դրել։ Հաջորդը Ամուլսարի ներդրումն էր, այսինքն` մի կազմակերպության ճակատագրով մենք տնտեսական աճ էինք նկարում։ Մյուսը Թեղուտն էր, որի հանքը փակվել է։ Երբ ժամանակին մարդիկ զգուշացնում էին, ասում էին` մի բացեք այդ հանքը, ասում էին` ոչինչ, գրեք, մեզ տնտեսական ակտիվության ցուցանիշ է պետք»,– ասաց Փաշինյանը։
Նրա խոսքով` այսօր ոչ թե տնտեսական անկման, այլ առողջացման գործընթաց է տեղի ունենում տնտեսության մեջ` խաղադրույքային տնտեսությունից անցում կատարելով արդյունաբերական տնտեսության։
Վարչապետի պաշտոնակատարը հայտարարեց, որ առաջիկայում նախատեսվում է բացել շաքարի, կենցաղային տեխնիկայի նոր գործարաններ։
Տնտեսական աճը ոչ միայն կկանգնի, այլև անկում կապրի. ՊԵԿ նախագահի կանխատեսումը
Ազգային վիճակագրական ծառայությունն այսօր հրապարակել է հոկտեմբերի տնտեսական ցուցանիշները։ Պաշտոնական վիճակագրության համաձայն` նախորդ երկու ամիսներին գրեթե զրոյի ձգտող տնտեսական աճի ցուցանիշը հոկտեմբերին բարձրացել է` կազմելով 3 տոկոս։ 2018թ-ի հոկտեմբերին 2017թ–ի հոկտեմբերի համեմատ տնտեսական ակտիվության ցուցանիշը կազմել է 3 տոկոս: Ընդ որում, ընթացիկ տարվա հունվար-հոկտեմբեր ամիսներին նախորդ տարվա նույն ժամանակահատվածի նկատմամբ տնտեսական ակտիվությունը բարձրացել է 6%-ով: