ԵՐԵՎԱՆ, 20 նոյեմբերի — Sputnik. ՀՀ վարչապետի պաշտոնակատար Նիկոլ Փաշինյանն արդեն հայկական արտադրության փողկապ ունի։ Այսօր` նոյեմբերի 20-ին, հրավիրված ասուլիսին Փաշինյանը ներկայացավ հենց այդ փողկապով։
Նա հիշեցրեց, որ հոկտեմբերի 24-ին ԱԺ–ում ելույթի ժամանակ հայտարարել էր, որ իր հագին հայկական արտադրության հագուստ է` բացառությամբ փողկապի, քանի որ հայկական արտադրության փողկապ չի կարողացել գտնել։
«Արտադրողներն իրենք արձագանքեցին, և այսօր ես ասուլիսից առաջ ստացա երկու փողկապ, որոնցից մեկը որոշեցի ասուլիսի ընթացքում կրել»,– ասաց Փաշինյանը։
ՀՀ վարչապետի պաշտոնակատարը խոսեց ժողովրդի առաջ ստանձնած պարտավորությունների մասին` նշելով, որ հոկտեմբերի 1-ի դրությամբ ինքն ու իր թիմը կատարել են հեղափոխության օրերին ժողովրդի առաջ ստանձնած բոլոր պարտավորությունները։
«Մենք խոստացել էինք, որ եթե Հայաստանի ժողովուրդը արտահայտի իր կամքը, մենք կապահովենք Սերժ Սարգսյանի և իր թիմի հեռացումը բացարձակապես խաղաղ եղանակով»,– ասաց Փաշինյանը։ Երկրորդ խոստումը` ազատ ընտրությունների իրավունքի ապահովումը, նրա խոսքով, արդեն իրականություն է դարձել ՏԻՄ ընտրությունների օրինակով։ Երրորդը կոռուպցիայի դեմ պայքարն է, որ դարձյալ, ըստ վարչապետի պաշտոնակատարի, արդեն իրողություն է։
Մենաշնորհների դեմ պայքարը, արտոնյալների վերացումն ու արտահերթ խորհրդարանական ընտրությունների կազմակերպումը ևս, նրա խոսքով, լիարժեք կատարված են։
Իսկ արտահերթ ընտրություններում վստահության քվե ստանալու դեպքում Փաշինյանը խոստացավ տնտեսական հեղափոխություն իրականացնել, Հայաստանը դարձնել արդյունաբերական, տեխնոլոգիական ու բնապահպանական բարձր չափանիշներ ունեցող երկիր։ Խոստացավ նաև ապահովել Հայաստանի ու Արցախի անվտանգությունը։