ԵՐԵՎԱՆ, 16 նոյեմբերի — Sputnik. Դատախազը 5 միլիոն ռուբլու հայց է ներկայացրել կրկեսի տնօրենի դեմ Կրասնոդարի երկրամասի Ուսպենսկի շրջանում աղջկա վրա առյուծի հարձակումից հետո, ՌԻԱ Նովոստիին հաղորդել են Կուբանի դատախազությունից։
«Հայցը ներկայացրել է դատախազը։ Դատարանի կողմից քրեական գործը դիտարկելիս կքննվի նաև դատախազի հայցը, որը ներկայացվել է կրկեսի տնօրենի դեմ Քրեական դատավարության օրենսգրքի 44–րդ հոդվածով` 5 միլիոն ռուբլի տրամադրելու համար` որպես բարոյական վնասի փոխհատուցում, որը պատճառվել է տուժածին առյուծի հարձակման հետևանքով։ Դատախազը գործում է անչափահաս երեխայի շահերի պաշտպանությունից ելնելով», – բացատրել են դատախազությունից։
Հիշեցնենք` հոկտեմբերի 28–ին Կրասնոդարի երկրամասի Ուսպենսկոյե գյուղում առյուծը հարձակվել էր չորս տարեկան երեխայի վրա։
Աղջկան տեղափոխել էին վերակենդանացման բաժանմունք։ Քսյուշային վիրահատել են, բայց բժիշկներն առայժմ կանխատեսումներ չեն անում։
Շապիտոյի տնօրենի` 51–ամյա Անդրեյ Մանուչարյանի դեմ հարուցվել է քրեական գործ` «Ծառայության տրամադրում, որը չի համապատասխանում սպառողների կյանքի և անվտանգության պահանջներին» հոդվածով։