ԵՐԵՎԱՆ, 15 նոյեմբերի — Sputnik. «Բիզնես Արմենիա» հիմնադրամի գործադիր տնօրեն Արմեն Ավակ Ավակյանն այսօր` նոյեմբերի 15-ին հրաժարականի դիմում է ներկայացրել։ Ավակ Ավակյանն այս մասին հայտնել է Facebook սոցիալական ցանցի իր էջում։
«Այսօր Բիզնես Արմենիա հիմնադրամի հոգաբարձուների խորհրդին եմ ներկայացրել իմ հրաժարականի դիմումը»,– գրել է նա։
Շնորհակալություն հայտնելով գործընկերներին համատեղ աշխատանքի համար` Ավակ Ավակյանը նշել է, որ նրանց աշխատանքի շնորհիվ «Բիզնես Արմենիան» այսօր ոչ միայն Հայաստանի ուժեղագույն կառույցներից մեկն է դարձել, այլև բազմիցս գնահատվել է միջազգային խոշորագույն կազմակերպությունների կողմից։
Նա նաև գրել է, որ անկախ փոփոխություններից, «Բիզնես Արմենիան» շարունակելու է աշխատել, խնդիրներ լուծել և աջակցել երկրում նոր ներդրումներ կամ արտահանումներ իրականացնելուն։
Ավակ Ավակյանն առայժմ ժամանակավոր պաշտոնակատարի կարգավիճակով կշարունակի ապահովել կազմակերպության ու դրա աջակցությամբ իրականացվող ներդրումային ծրագրերի շարունակականությունը, իսկ նոր տնօրենի ընտրությունից հետո այդ պարտականությունները կփոխանցի նրան։
Արմեն Ավակ Ավակյանն 2017թ․–ից ղեկավարել է Հայաստանի զարգացման հիմնադրամը, որն ավելի ուշ վերանվանվել և դարձել է «Բիզնես Արմենիա»։
Մինչ այդ Ավակյանը 2016 թ. դեկտեմբերի 1–ից՝ ՀՀ վարչապետ Կարեն Կարապետյանի խորհրդականն էր։ Ավելի վաղ ղեկավարել է «Հայաստան» համահայկական հիմնադրամը, «Գարրիսոն Գրուփ» կազմակերպությունն ու եղել է «Յունայթիդ Ուեյ» հիմնադրամի հոգաբարձուների խորհրդի անդամ։
Նա անկուսակցական է, ամուսնացած է, ունի մեկ երեխա: