ԵՐԵՎԱՆ, 14 նոյեմբերի — Sputnik. Հայաստանում ծերերի քանակը գերազանցել է բնակչության ընդհանուր թվի 10%–ը։ Այս մասին այսօր հրավիրված ասուլիսի ժամանակ ասաց տնտեսագետ Թադևոս Ավետիսյանը` պատասխանելով Sputnik Արմենիայի հարցին։
«Այսօր Հայաստանում մեկ թոշակառուին բաժին է ընկնում մեկ աշխատող, ինչը բնորոշ է ծերացող բնակչություն ունեցող երկրներին», – ասաց Ավետիսյանը։
Տնտեսագետը նշեց, որ կան երկրներ, որտեղ թոշակառուին երկու կամ ավելի աշխատողներ են «պահում», բայց դա չի նշանակում, որ դրան պետք է ձգտել միայն մասնավոր հատվածի աշխատողների հաշվին։
«Շուրջ 1.2 մլն ակտիվ քաղաքացիներից (աշխատունակ բնակչություն) մոտ 236 հազարը գործազուրկ են։ Նրանցից միայն 60 հազարն են որպես գործազուրկ գրանցվել», – ասաց Ավետիսյանը։
Նա նաև նշեց, որ շուրջ 1 մլն աշխատող մարդկանցից մոտ 550 հազարը վարձու աշխատող են, որոնցից 350 հազարը մասնավոր հատվածում են աշխատում։
Տնտեսագետի կարծիքով` չի կարելի պնդել, որ միայն այդ 350 հազար քաղաքացիներն են արտադրանք, արժեք ստեղծում։
«Չի կարելի որպես արժեք դիտարկել միայն պատրաստի արտադրանքը։ Ուսուցչի, բժիշկի, մանկատների աշխատակիցների աշխատանքը նույնպես արժեք է ներկայացնում», – նշեց Ավետիսյանը։
Այլ հարց է, որ աշխատանքի անարդյունավետության խնդիր կա ինչպես մասնավոր, այնպես էլ պետական հատվածում։
Ինչպես նշեց տնտեսագետը, աշխատող քաղաքացիների քանակը, բնականաբար, պետք է աճի։ Եթե պետությունն ուզում է ավելացնել երիտասարդ քաղաքացիների թիվը, ապա պետք է խթանել մարդկանց հոսքը Հայաստան, զարգացնել տնտեսությունն ու բարելավել ժողովրդագրական իրավիճակը։
Երկրից մեկնում են հենց երիտասարդները, այդ իսկ պատճառով պետք է պայմաններ ստեղծել, որպեսզի նրանք չմեկնեն կամ վերադառնան հայրենիք։
Հիշեցնենք, որ 2018 թվականի հուլիսի 1-ի տվյալներով` Հայաստանում 461 հազար 68 թոշակառու կա, որոնցից 280 հազար 45-ը կանայք են։
Ավելի վաղ Աստանայում հայ համայնքի ներկայացուցիչների հետ հանդիպմանը ՀՀ վարչապետի պաշտոնակատար Նիկոլ Փաշինյանը հայտարարել էր, որ 350 հազար մարդ աշխատում է, որպեսզի կերակրի 800 հազարին։ Նա նշել էր, որ Հայաստանում մինչև վերջերս ձրիակերությունը խրախուսելու քաղաքականություն է իրականացվել, իսկ նոր իշխանությունը խրախուսելու է աշխատանքը։