ԵՐԵՎԱՆ, 14 նոյեմբերի — Sputnik. «Իմ քայլը» դաշինքը քիչ առաջ ԿԸՀ է ներկայացրել ԱԺ արտահերթ ընտրություններին մասնակցելու փաստաթղթերն ու նախընտրական ցուցակը, որտեղ ներկայացված են 183 թեկնածու։ Ինչպես ԿԸՀ–ում լրագրողներին ասաց ՔՊ մամուլի խոսնակ Վահան Կոստանյանը, ցուցակը հասարակական լայն ընդգրկվածություն ունի։ Դրանում ՔՊ և «Առաքելություն» կուսակցությունների քաղաքական թիմերի անդամներն են, կառավարության անդամներ, ԱԺ պատգամավորներ ու հանրային դեմքեր։
«Ցուցակը ձևավորվել է կուսակցության ներսում տեղի ունեցած քննարկումների արդյունքում ձևավորված սկզբունքներով»,– ասաց Կոստանյանը` հավելելով, որ նախընտրական ցուցակը համապատասխանում է բարիկադները քանդելու ժամանակների կոչին։
Անդրադառնալով դրանում նախկին ՀՀԿ–ականների ներգրավվածությանը` Կոստանյանն ասաց, որ խոսքը, թերևս, պատգամավոր Շիրակ Թորոսյանի ու ԱԻ նախարարի պաշտոնակատար Ֆելիքս Ցոլակյանի մասին է ու հիշեցրեց, որ նրանք ՀՀԿ անդամներ չեն ու հիմա էլ ցուցակում ներգրավվել են որպես անկուսակցականներ։
«Իմ քայլը» դաշինքի համամասնական ցուցակի առաջին տասնյակն ինչպես արդեն հայտնել ենք, հետևյալն է.
Փաշինյան Նիկոլ Վովայի – Քաղաքացիական պայմանագիր կուսակցություն (ՔՊԿ),
Միրզոյան Արարատ Սամվելի – ՔՊԿ,
Նազարյան Լենա Ռաֆայելի – ՔՊԿ,
Ավինյան Տիգրան Արմենի – ՔՊԿ,
Հարությունյան Արայիկ Էդուարդի – ՔՊԿ,
Սիմոնյան Ալեն Ռոբերտի – ՔՊԿ,
Միքայելյան Սասուն Մեխակի – ՔՊԿ,
Մակունց Լիլիթ Կամոյի – ՔՊԿ,
Պապիկյան Սուրեն Ռաֆիկի – ՔՊԿ,
Բաթոյան Զարուհի Վալերիանի – ՔՊԿ։
Ցուցակում կան նաև մի քանի լրագրողներ` «Ազատություն» ռադիոկայանի թղթակից Սիսակ Գաբրիելյանը, «Ժողովուրդ» օրաթերթի գլխավոր խմբագիր Թագուհի Թովմասյանը, Հանրային կապերի մասնագետ Անուշ Բեղլոյանը, Հանրային հեռուստաընկերության Լրատվական և վերլուծական հաղորդումների տնօրեն Վահագն Թևոսյանը և ուրիշներ։
Լրագրողների լայն ներկայացվածությունը ցուցակում խոսնակ Վահան Կոստանյանը տրամաբանական է համարում, քանի որ քաղաքական պրոցեսների լուսաբանմամբ երկար տարիներ զբաղված մարդիկ, ովքեր հասկանում են քաղաքականությունից, ըստ նրա, ցանկանում են նաև մասնակցել այդ գործընթացներին։