ԵՐԵՎԱՆ, 13 նոյեմբերի — Sputnik. Հայաստանում ID քարտերով գնումներ կատարելը կարելի է շատ արագ և հեշտությամբ կարգավորել։ Այսօր լրագրողների հետ զրույցում այս մասին ասաց ՀՀ ՊԵԿ–ի պետի տեղակալ Միքայել Փաշայանը։
Նոր սերնդի հսկիչ-դրամարկղային մեքենաները, որոնք արդեն տեղադրված են Հայաստանի բոլոր առևտրային կետերում, մի քանի ֆունկցիա են ներառում։ Սարքերը ոչ միայն գնման կտրոններն են տրամադրում, այլև կարդում են բանկային և ID քարտերը։
Այսինքն` արդեն այսօր խանութներից հնարավոր է հանգիստ գնումներ կատարել բանկային քարտերով։ «Այլ հարց է, որ Հայաստանում այս պրակտիկան դեռ այդքան էլ տարածված չէ», –նկատեց Փաշայանը։
Իսկ եթե խոսենք ID քարտերի մասին, ապա հսկիչ-դրամարկղային սարքերն արդեն կարդում են դրանք։ Ավելին` կարելի է դրանք օգտագործել ոգելից խմիչք և ծխախոտ գնողների տարիքը ստուգելու համար։
Այսպիսով, հարկային ծառայությունը կարող է գնումները հաստատել ID քարտերով։ Դրանք բանկային քարտերին չեն փոխարինում, որովհետև դրանց վրա գումար չի նստում։ Սակայն եթե գնումները հաստատվեն քարտով, հարկային ծառայությունը կհասկանա, թե ով և որքան գումար է ծախսում, այնուհետև կհասկանա` ծախսերն ու եկամուտը համընկնում են, թե ոչ, և արդյոք որևէ մեկը «լևի», չհարկվող գումարներ ունի, թե ոչ։
Լրացուցիչ ծախսերի կարիք չկա ո՛չ սարքեր գնելու, ո՛չ էլ հարկային ծառայությունների սերվերների համար։
«Բավական է կառավարության որոշումը, որպեսզի ՊԵԿ–ը թույլ տա նման կարգ կիրառել», – ասաց Փաշայանը։
Իսկ որպեսզի քաղաքացիները շահագրգռված լինեն իրենց գնումները հարկայինին ցույց տալու հարցում, նրանց կառաջարկեն հետ ստանալ ծախսած գումարի մի մասը (սուպերմարկետներում «քեշբեքի» նման)։ Բոլոր գնումների թվից տարեվերջին հնարավոր կլինի վերադարձնել 1-3%–ը։ Այս մասին իմանալով` քաղաքացիներն ավելի ակտիվորեն կպահանջեն հսկիչ–դրամարկղային կտրոնները, իսկ դա նշանակում է, որ հանրապետությունում կկրճատվի ստվերային առևտուրը։