ԵՐԵՎԱՆ, 13 նոյեմբերի — Sputnik. «Ունիվեր» սերիալի դերասանուհի Աննա Խիլկևիչը հայ դիզայների կարած զգեստով է ստացել «OK!» մրցանակը «Տարվա մայր» անվանակարգում։ Այս մասին դերասանուհին հայտնել է Instagram սոցցանցի իր էջում։
Խիլկևիչը երկրորդ երեխայի ծնվելուց հետո ներկայացել է իրանը գրկող սև զգեստով, որի հեղինակը հայ դիզայներ Mardzhan–ն է։ Այդ փաստը բավական հատկանշական է, որովհետև նրա երեխայի ծնունդը նույնպես հայ գինեկոլոգ է ընդունել` Վադիմ Գրիգորյանը։ Խիլկևիչի երեխաների հայրը, ի դեպ, նույնպես հայ է։
Մրցանակաբաշխության արարողության լուսանկարը հրապարակելուց հետո Խիլկևիչը բազմաթիվ հաճոյախոսություններ և շնորհավորանքներ է ստացել։ Նրան խնդրել են այլևս չնիհարել, որպեսզի քայլող կմախքի չնմանվի։
Հիշեցնենք` Աննա Խիլկևիչի ամուսինը հայ գործարար Արթուր Վոլկովն է։ Զույգն իր հարաբերություններն օրինականացրել է 2015 թվականին։ Նույն թվականին ծնվել է նրանց առաջնեկը` Արիաննան։ Իսկ այս տարվա օգոստոսի 20-ին ծնվել է նրանց երկրորդ զավակը։
Այս պատմության մեջ ևս մի հատկանշական հանգամանք կա. վերջերս Խիլկևիչի ամուսինը խոստովանել էր, որ անգամ ինքը նախապես չի իմացել երեխայի սեռը։ Համացանցի օգտատերերը ենթադրել էին, որ Խիլկևիչը հաստատ աղջիկ է ունենալու, այդ պատճառով էլ չի ցանկացել այդ մասին հայտնել հայ ամուսնուն։