Նանե Բագրատունի–Ասատրյանը նշում է, որ մարզի հետ միշտ է կապի մեջ եղել։
«Որոշ գործընթացների դինամիկան ինձ համար տեսանելի էին, բայց երբ ռակուրսդ փոխում ես, ցավոք սրտի, որոշ խնդիրներ ընդգծվում են։ Օրինակ` միայնակ մայրերի թիվն ավելացել է։ Սկսել ենք կարծրատիպեր կոտրելուց։ Դուռս բացվում է, քաղաքացին ասում է` կարելի՞ է։ Համեցեք։ Ասում է` վերջապես այստեղ կին է նստած, և ես դուխով եկել եմ»,– պատմում է նա։
Բագրատունին նշում է, որ այսօր իրենք քայլ առ քայլ իրականություն են դարձնում ժողովրդավարությունը։
«Մի կին է եկել մոտս, խնդիր է ներկայացնում, ասում եմ` կարող եք դիմում գրել, մենք անպայման կանդրադառնանք։ Ասում է` ո՞նց, ես կարող եմ դիմում գրել, բա ինձ ասել են` միայն ամուսիններն են գրում»,– պատմում է նա` նշելով, որ ամեն օր են բախվում այս կարծրատիպերին։
Բագրատունու դիտարկումները ցույց են տվել, որ դրանք սրվել են վերջին տարիների ընթացքում։
«Վերջին երկու տարում յուրաքանչյուր ընդունելության օրը վերածվել էր օրինական կաշառք բաժանվելու օրվա կամ գումարները փոշիացնելու մի ձևաչափի»,– ասում է նա։
Բագրատունու խոսքով` քաղաքացիները դիմել են` խնդրելով տրամադրել ֆինանսական աջակցություն։ ՀՀԿ–ական նախկին մարզպետի օրոք հրահանգվել է բոլորին տրամադրել գումար` 15-20 հազար դրամի չափով։ Այսինքն մարդկանց չեն մերժել, բայց որևէ հիմնախնդիր չի լուծվել։