ԵՐԵՎԱՆ, 12 նոյեմբերի – Sputnik. 45 տարի առաջ՝ 1973 թվականի հոկտեմբերին, հայ ժողովուրդը մեծ խնդությամբ տոնում էր Երևանի «Արարատի» հաղթանակը նախկին ԽՍՀՄ գավաթի խաղարկության եզրափակիչում: Հաղթանակ, որից հետո մեր ֆուտբոլում նման արդյունքներ չեղան:
Sputnik Արմենիա մամուլի կենտրոնում այսօր տեսակամուրջ էր կազմակերպվել Մոսկվայի հետ: «Արարատ 73»–ի մարզիչ Նիկիտա Սիմոնյանին տեսնելով էկրանին` ֆուտբոլիստներ Սերգեյ Բոնդարենկոն և Սերգեյ Պողոսյանը, որոնք երևանյան սրահում էին, անմիջապես ժպտացին ու շտապեցին շնորհակալություն հայտնել այն մարդուն, որին իրենց ֆուտբոլային հայրն են համարում:
«Մի քանի օր առաջ Երևանում տոնում էինք իմ 70–ամյակը, և ես շատ ուրախ եմ, որ Հայաստանում ինձ չեն մոռացել: Իսկ ձեզ ևս մեկ անգամ շնորհակալություն եմ հայտնում հայրական վերաբերմունքի համար: Երկար կյանք եմ ցանկանում քեզ, անմոռանալի մարդ»,- ասաց Բոնդարենկոն:
Լեգենդար «Արարատի» կիսապաշտպանը նշեց, որ իրենք նման արդյունքի հասան տքնաջան աշխատանքի, վարպետության ու մարզչական հմտության շնորհիվ, և այդ հաղթանակը դեռ երկար ժամանակ չի մոռացվի:
Սերգեյ Պողոսյանն էլ ավելացրեց, որ «Արարատը» հաղթեց նաև ֆենոմենալ նվիրվածության շնորհիվ:
«Մենք ամբողջ թիմով հասկանում էինք, որ կարող ենք պատմություն կերտել և այդ հաղթանակին գնացինք համառորեն ու մեծ աշխատասիրությամբ` թիկունքից զգալով Հայաստանի ու հայ ժողովրդի աջակցությունը»,– ասաց նա:
Ռուսաստանի ֆուտբոլային դաշնության 92–ամյա փոխնախագահը, շնորհավորելով Սերգեյ Բոնդարենկոյին ծննդյան 70–ամյակի կապակցությամբ, նշեց , որ չնայած արդեն պատկառելի տարիքին` ինքը, միևնույնն է, «Արարատի» նախկին ֆուտբոլիստին երիտասարդ է համարում։
«Տարիների տարբերությունը մնում է, և ես բոլորին իմ զավակներն եմ համարում: Փառք ու պատիվ ձեզ, տղաներ, որ հասաք այդ հաղթանակին: Ու հազար ափսոս, որ այդ հաղթանակ կերտողներից շատերն արդեն չկան»,– ասաց Սիմոնյանը:Նա խոսեց նաև հայկական ֆուտբոլի ներկայի մասին։ Սիմոնյանը նշեց, որ ֆուտբոլի զարգացումը չպետք է մտահոգի միայն ակումբին կամ ֆեդերացիային։ Ֆուտբոլը պետք է զարգացնել նաև պետության օգնությամբ։
«Այսօրվա սերնդի մեջ պետք է զարգացնել մարդկային ու խաղային այն որակները, որոնցով օժտված էին «Արարատ»-73-ի տղաները: Այդ դեպքում կունենանք արդեն ոչ թե Հենրիխ Մխիթարյան, այլ Մխիթարյաններ»,- ասաց լեգենդար ֆուտբոլիստն ու մարզիչը: