ԵՐԵՎԱՆ, 12 նոյեմբերի — Sputnik. Շվեդական կործանիչների հետ կապված որևէ որոշում չի կայացվել։ Այսօր հրավիրված ասուլիսի ժամանակ ասաց ՀՀ պաշտպանության նախարարի պաշտոնակատար Դավիթ Տոնոյանը` մեկնաբանելով շվեդական JAS-39 Gripen կործանիչներ ձեռք բերելու լուրը։
«Եկեք չկենտրոնանանք որևէ զինատեսակի վերաբերյալ ՀՀ ՊՆ որևէ առաջարկության վրա: Մենք բոլոր առաջարկություններն ուսումնասիրում ենք», – – ասաց նա։
Տոնոյանի խոսքով` որոշումներն ընդունվում են կախված որակից, գնից և զենքի մատակարարման ժամկետներից։
«Gripen –ի հետ կապված որևէ որոշում չկա։ Կա այլ առաջարկ ուրիշ գործընկերոջից, այն լրջորեն ուսումնասիրվում է, երևի մոտ ապագայում որոշում կկայացվի», – ասաց Տոնոյանը։
Ավելի վաղ ԶԼՄ–ները տեղեկություն էին տարածել, որ Հայաստանը քննարկում է շվեդական JAS-39 Gripen կործանիչներ ձեռք բերելու հարցը։ Մինչ այդ ռուսական ԶԼՄ–ները հայտնել էին, որ Երևանը շահագրգռված է ռուսական СУ-30СМ գնելու հարցում։