ԵՐԵՎԱՆ, 12 նոյեմբերի — Sputnik. Հայաստանի ու Ադրբեջանի միջև օպերատիվ կապը գործում է անխափան, այսօր հրավիրված ասուլիսի ժամանակ ասաց ՀՀ պաշտպանության նախարարի պաշտոնակատար Դավիթ Տոնոյանը։
«Օպերատիվ կապի համար նշանակված են համապատասխան պաշտոնյաներ թե՛ ՀՀ-ում, թե՛ Ադրբեջանում. կապն իրականացվում է այդ պաշտոնյաների միջոցով։ Այդ պաշտոնյաները տեղեկությունները ստանում են զինված ուժերից։ Մինչ այժմ այդ կապը գործում է անխափան», – ասաց Տոնոյանը։
Նա վստահեցրեց, որ Դուշանբեում ձեռք բերված պայմանավորվածությունները գործում են։
Նախարարի պաշտոնակատարի խոսքով՝ հայկական կողմը բարձրաձայնում է նաև անմիջական հրամանատարների միջև օպերատիվ կապի ստեղծման հարցը։
«Անմիջական հրամանատարների օպերատիվ կապի ստեղծման հարցը մենք բարձրացնում ենք։ Սա պատահարների նվազեցման միջոց է։ Համանախագահների մոտ բարձրացնում ենք այս հարցը»,- ասաց նախարարի պաշտոնակատարը։
Նրա խոսքով` դա կբարձրացնի փոխգործակցության արդյունավետությունը և շփման գծում իրավիճակի սրացում թույլ չի տա։
Նշենք, որ Դուշանբեում կայացած ԱՊՀ գագաթնաժողովից վերադառնալուց հետո ՀՀ վարչապետ Նիկոլ Փաշինյանն ասել էր, որ Ալիևի հետ «բլից» հանդիպման ժամանակ որոշվել էր օպերատիվ կապ հաստատել։