ԵՐԵՎԱՆ, 5 նոյեմբերի — Sputnik. Հայաստանի դատական համակարգն անկախ է, դատավորների նկատմամբ ճնշումներ չեն կիրառվում։
Sputnik Արմենիայի հետ զրույցում նման տեսակետ հայտնեց Վերաքննիչ քաղաքացիական դատարանի նախագահ Արսեն Մկրտչյանը` անդրադառնալով հանրության շրջանում առկա այն մտահոգություններին, թե դատավորները շարունակում են «վերևից» զանգեր ստանալ։
«Մենք ամեն ինչ ունենք անկախ գործելու համար և գործում ենք։ Չունենք որևէ սահմանափակում։ Մենք ունենք աննախադեպ իրավիճակ, երբ քաղաքական կամքի տեսանկյունից նույնպես դատավորների անկախ գործելու մասին հայտարարություն է եղել, ինչը շատ քիչ երկրներում է լինում»,– ասաց նա։
Արսեն Մկրտչյանի համոզմամբ դատական համակարգի նկատմամբ վստահության ավելացման մասին են վկայում նաև «թավշյա հեղափոխությունից» հետո ավելացած բողոքարկումները։
«Նաև բողոքարկման որակն է բարձրացել, ինչը պայմանավորված է մարդկանց` իրենց իրավունքների պաշտպանության ձգտումով»,– ասաց Մկրտչյանը։
Վերաքննիչ քաղաքացիական դատարանի նախագահի խոսքով, այս տարվա առաջին 9 ամիսներին նախորդ տարվա նույն ժամանակահատվածի համեմատ 1000-ով ավելի վերաքննիչ բողոքներ են ստացվել։
«Ի տարբերություն նախորդ հասարակարգի, այսօր հանրության մեջ շատ քիչ է այն տեսակետը, թե ոչինչ էլ չի փոխվի` բողոքարկենք, թե չբողոքարկենք։ Ես դա կպայմանավորեի հենց վստահության մեծացմամբ, ընդ որում, ոչ միայն դատական իշխանության, այլև ընդհանրապես պետական իշխանության նկատմամբ»,– ասաց Մկրտչյանը։
Ի տարբերություն միջպետական դատական ատյանների, Մարդու իրավունքների եվրոպական դատարան ներկայացվող դիմում– բողոքներն, Արսեն Մկրտչյանի կարծիքով, առաջիկայում կարող են էապես նվազել։ Ներհայաստանյան դատական համակարգի անկախ գործելուց բացի դրան կարող է նպաստել այն հանգամանքը, որ ՀՀ Վերաքննիչ քաղաքացիական դատարանը միացել է ՄԻԵԴ–ում գործող բարձր դատարանների ցանցին։
Արսեն Մկրտչյանի դիտարկմամբ՝ այդ ցանցը ոչ միայն արագ տեղեկատվության փոխանակման էլեկտրոնային հարթակ է, այլև հնարավորություն է տալիս տեղեկանալու, թե որ դիրքորոշումներն են կարևորվում եվրոպական դատարաններում։