ԵՐԵՎԱՆ, 3 նոյեմբերի – Sputnik. Դիմակավորված ու զինված անձինք հարձակվել են Արմավիր քաղաքի Երևանյան փողոցի թիվ 25/1 հասցեում գտնվող «Ֆաստ Կրեդիտ ՈՒՎԿ» ՓԲԸ-ի աշխատակցի վրա։ Այս մասին հայտնում է shamshyan.com-ը։
Ըստ կայքի` Ոստիկանության Արմավիրի բաժինն ահազանգը ստացել է երեկ` նոյեմբերի 2-ին, ժամը 04։00-ի սահմանում։
Ոստիկաններն ու քննիչները պարզել են, որ ժամը 04։00-ի սահմաններում անհայտ անձը մուտք է գործել նշված «Ֆաստ Կրեդիտ» ընկերության տարածք, մոտեցել դրամարկղին, այնուհետև դեպի հետնամաս նայող պատուհանի փեղկը բացել է, որից հետո մեկ այլ դիմակավորված անձ հրազենը պահել է դրամարկղի ուղղությամբ գտնվող աշխատակցի վրա, իսկ ներսում գտնվող մյուս դիմակավորվածը փորձել է կոտրել դրամարկղի զրահապատ ապակին։
Նրանք իրենց գործն ավարտին չեն կարողացել հասցնել, քանի որ ներսում ծառայություն կատարող Ոստիկանության պետական պահպանության գլխավոր վարչության Արմավիրի պահպանության բաժանմունքի հետ միացված անվտանգության համակարգի ձայնային ազդանշանի կոճակը Ոստիկանության ծառայողը հասցրել է սեղմել, և դա նկատելով՝ դիմակավորված անձինք փախել են։
Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ հանցագործությունը բացահայտելու, կատարողներին հայտնաբերելու ուղղությամբ։