ԵՐԵՎԱՆ, 2 նոյեմբերի — Sputnik. Հայաստանը հստակորեն ցույց տվեց ամերիկացի գործընկերներին իր ազգային անվտանգության առաջնահերթությունները։
Այս մասին այսօր խորհրդարանում ասաց ՀՀ արտգործնախարարի պաշտոնակատար Զոհրաբ Մնացականյանը` 2019 թվականի Հայաստանի բյուջեի քննարկման ժամանակ` մեկնաբանելով ԱՄՆ նախագահի ազգային անվտանգության գծով խորհրդական Ջոն Բոլտոնի հայաստանյան այցը։
«Իհարկե, մենք ազգային անվտանգության առաջնահերթություններ ունենք։ Բոլտոնի այցն այդ հարցերը քննարկելու լավ առիթ դարձավ։ Շատ կարևոր է հասկացնել ամերիկացի գործընկերներին մեր տեսակետը հիմնական հարցերով, ցույց տալ մարդկանց մեր գործողությունների տրամաբանությունը», – ասաց Մնացականյանը։
ԱՄՆ–ի հետ հարաբերությունների զարգացումը Հայաստանի արտաքին քաղաքականության կարևորագույն ուղղություններից է։
Միաժամանակ արտգործնախարարի պաշտոնակատարն ասաց, որ ամերիկացի գործընկերները գիտեն Ռուսաստանի և Իրանի հետ Հայաստանի հարաբերությունների մակարդակի մասին։
Հիշեցնենք` ԱՄՆ–ի նախագահի խորհրդական Ջոն Բոլտոնը Հայաստան էր այցելել Հարավային Կովկաս ու Ռուսաստան տարածաշրջանային այցի շրջանակում։