Վարդանյանը վստահեցնում է, որ Իրանի, Ադրբեջանի և Թուրքիայի արտգործնախարարների 6-րդ եռակողմ հանդիպումը որևէ կերպ չի ազդի հայ–իրանական հարաբերությունների վրա։
«Այս համատեքստում ոչինչ չի փոխվել։ Հանդիպման ժամանակ հնչել են կարծիքներ, որոնք նմանատիպ ձևաչափով հնչել են նաև նախորդ հանդիպումների ժամանակ, բայց մենք չպետք է թերանանք և ձեռքերը ծալած նստենք` ասելով, որ ոչինչ չի փոխվել, նույն ձևաչափով հայտարարություններ են հնչել և այլն»,– ասում է արևելագետը։
Ըստ Վարդանյանի` պետք է հասկանանք, որ Ադրբեջանում ամեն վայրկյան իրավիճակ է փոխվում։
«Պետք է պատրաստ լինենք դրան, մի փոքր «ագրեսիվ» քաղաքականություն վարենք արտաքին քաղաքականությունում և ինքներս նախաձեռնենք երկկողմ, եռակողմ, քառակողմ հանդիպումներ, ոչ թե դիտորդի կարգավիճակում հետևենք, թե ինչ են անում տարածաշրջանում»,– ասում է նա։
Արևելագետը նշում է, որ Հայաստանը պետք է թելադրողի դերում լինի։
«Մենք ունենք այդ ներուժը։ Ասվածը հիմնված է փաստերի վրա, որովհետև ժամանակին եղել են նմանատիպ հանդիպումներ արտգործնախարարների և ավելի բարձր մակարդակով, և հիմա կարելի է պարզապես նոր լիցք հաղորդել դրանց»,– ասում է նա։
Թուրքիայի, Իրանի ու Ադրբեջանի Արտգործնախարարներ Մևլութ Չավուշօղլուի, Ջավադ Զարիֆի և Էլմար Մամեդյարովի 6-րդ եռակողմ հանդիպումը տեղի է ունեցել հոկտեմբերի 30-ին։