ԵՐԵՎԱՆ, 30 հոկտեմբերի — Sputnik. Ռուսաստանի ու Հայաստանի փոխհարաբերությունների մակարդակը ոչ մի կերպ կախած չէ ներքաղաքական իրավիճակից։ Ռուսաստանում Հայաստանի դեսպան Վարդան Տողանյանն այս մասին ասել է «Էխո Մոսկվի» ռադիոկայանի ուղիղ եթերում։
«Հայ-ռուսական հարաբերությունների այսօրվա մակարդակը ոչնչով չի տարբերվում երեկվանից», — ընդգծել է դեսպանը։
Տողանյանը նշել է նաև, որ երկու պետությունների միջև ստեղծված հարաբերությունները տարբեր ոլորտներ են ներառում։ Նրա խոսքով` մշակութային ու հումանիտար կապերից բացի, Հայաստանն ու Ռուսաստանը հարաբերություններն ամրապնդում են նաև ընդհանուր ինտեգրացիոն կառույցներում։
«Խոսքը ռազմատեխնիկական ու ռազմաքաղաքական համագործակցության մասին է այն ինտեգրացիոն գործընթացների շրջանակում, որոնցում մենք համագործակցում ենք Ռուսաստանի հետ` Եվրասիական տնտեսական միություն, ՀԱՊԿ», — ասել է դեսպանը։
Տողանյանը հիշեցրել է նաև երկու երկրների համագործակցության ու բարեկամության բազմադարյա պատմությունը։