ԵՐԵՎԱՆ, 28 հոկտեմբերի — Sputnik, Արմենուհի Մխոյան. Գյումրու «Ավստրիական մոր ու մանկան» հիվանդանոցում հոկտեմբերի 27-ին 21:00 –ին լույս աշխարհ է եկել ապրիլյան քառօրյայում հերոսաբար զոհված Վիկտոր Յուզիխովիչի եղբայրը: Sputnik Արմենիան նախկինում անդրադարձել է Վիկտորի հերոսություններին:
Ինչպես Sputnik Արմենիային տեղեկացրեց բժիշկ Արմեն Մկրտչյանը երեխան ծնվել է 3 կգ 250 գրամ քաշով և 53 սմ հասակով: Ի դեպ, 3 երեխաներից նման քաշ ունեցել է միայն Վիկտորը, քույրն ու եղբայրն ավելի փոքր էին ծնվել: Ծնունդը եղել է բնական եղանակով: «Թեև այդ ողջ սթրեսից մի քիչ ծննդաբերությունը բարդ էր, բայց մայրը կարողացավ հաղթահարել այն: Այս պահին մոր և փոքրիկի վիճակը լավ է: Նրանք դեռ 2 օր էլ կմնան հիվանդանոցում»,-նշեց բժիշկը:
Փոքրիկին հարազատները կանվանակոչեն Վիկտորի անունով: Աննա Յուզիխովիչը 42 տարեկան է, ունի մեկ որդի ու դուստր։ Աննայի խոսքով նորածինը ոչ միայն քաշով, այլ նաև արտաքինով է Վիկտորին նման:
Հիշեցնենք, Վիկտորի պապը ուկրաինացի է, տատը՝ հայ: Հայրը ծնվել է Մոլդովայում, բայց 1978 թվականից հոր ընտանիքը, երբ նա 3 տարեկան էր, տեղափոխվեց Գյումրի: Ընտանիքի երկրորդ զավակն էր, ուներ իրենից մեծ քույր և կրտսեր եղբայր: Վիկտորը զոհվեց դեռ 19 տարին չբոլորած: Բռնցքամարտիկ էր, Հայաստանի պատանիների կրկնակի չեմպիոն, Եվրոպայի փոխչեմպիոն: Ավարտել էր Գյումրու Օլիմպիական մարզական քոլեջը, բռնցքամարտի «Սպարտակ» ակումբի անդամ էր: Կարող էր ծառայել մարզական գումարտակում, բայց սեփական ցանկությամբ հրաժարվեց։ Ուզում էր ժամկետային ծառայությունից հետո մնալ և ծառայել որպես հետախույզ՝ երազանքն էր: