ԵՐԵՎԱՆ, 28 հոկտեմբերի –Sputnik. Երևանում հինգ տարեկան երեխան մահացել է թարախային մենինգիտից։ Նրան հիվանդանոց էին տեղափոխել անգիտակից վիճակում, երբ նրան փրկելն արդեն գրեթե անհնար էր։
Այս մասին Sputnik Արմենիայի թղթակցի հետ զրույցում ասաց «Սուրբ Աստվածամայր» ԲԿ վերակենդանացման բաժանմունքի վարիչ Աննա Չոբանյանը։
«Երեխան մեզ մոտ է տեղափոխվել հոկտեմբերի 17-ին անգիտակից վիճակում։ Նրան անմիջապես ինկուբացրել են, միացրել արհեստական շնչառության սարքին։ Գլխուղեղի համակարգչային տոմոգրաֆիա և նիմֆալ պունկցիա է իրականացվել», – ասաց Չոբանյանը։
Արդյունքում պնևմակոկային թարախային մենինգիտ է ախտորոշվել։ Այդ վիճակում երեխային արդեն հնարավոր չէր փրկել, ասաց նա։
Չոբանյանը նաև ընդգծել է, որ Հայաստանում պնևմակոկային պատվաստում է մտցվել 2014 թվականից։ Երեխան 2013 թվականի ծնունդ է, հետևաբար այն չի ստացել։ ԱՀԿ վիճակագրության համաձայն` մենինգիտից մահացության դեպքերը շատ են։
«Երեխան երեկ է մահացել, նույնիսկ հայրը զանգահարել և շնորհակալություն է հայտնել, որ մենք կարողացել ենք մի քանի օր նրա կյանքը երկարացնել», – ասաց Չոբանյանը։
Ինչպես հայտնում է shamshyan.com կայքը երեխայի մայրը` Հասմիկ Շահինյանը, հայտնել է, որ երեխան մահացել է բժիշկների կողմից իրենց պարտականությունները ոչ պատշաճ կերպով կատարելու պատճառով։ Համապատասխան հայտարարությունը նա ոստիկանություն է ներկայացրել։ Դատաբժշկական փորձաքննություն է նշանակված։