ԵՐԵՎԱՆ, 28 հոկտեմբերի – Sputnik, Նելլի Դանիելյան. Արարատի և Արմավիրի մարզերում սպասվող ցրտահարության մասին մեծամորցի Արսեն Գևորգյանը տեղեկացել է գյուղատնտեսության նախարարությունից իր բջջային հեռախոսահամարին ուղարկված հաղորդագրությունից:
Ու թեև հիմնական բերքը հաղորդագրությունը ստանալուց հետո հասցրել է հավաքել, բայց ոչ ամբողջությամբ: Մեր այցելության պահին տնամերձ հողամասում մնացած պղպեղը, սմբուկն ու լոլիկը, նրա խոսքով, այդպես էլ մնալու են, ինչպես ինքն է ասում՝ Աստծու հույսով:
«Իհարկե 90 տոկոսը հավաքել ենք: Մնացել է մի քիչ ծիծակ, մի քիչ բադրիջան, մի քիչ էլ պոմիդոր, խակ պոմիդոր», — ասում է մեր զրուցակիցը` ցույց տալով տնամերձ հողամասը, որտեղ դեռ բավականաչափ չհավաքված բերք կա:
Հարցին, թե ինչու մնացած բերքն էլ չեն շտապում հավաքել, Արսեն Գևորգյանը պատասխանում է. «Անձրևները խանգարեցին, անակնկալ սկսեցին ու գրեթե անդադար շարունակվում են: Այս ցեխին, մի 2000 դրամի համար արժե՞ մտնել, ցեխոտվել, երբ քաղաքում այս ապրանքը 200 դրամ է, իսկ մենք 50-ով ենք հանձնում»։
Արմավիրի ու Արարատի մարզերում մեր այցելության պահին հիմնական բերքահավաքն արդեն ավարտվել էր, բայց դաշտերում դեռ այսուայնտեղ գյուղացիները փորձում էին շտապողականությամբ փրկել դժվարությամբ աճեցված բերքը:
Անձրևի տակ իրենց հողակտորում ծաղկակաղամբ հավաքող ամուսիններն էլ հայտնեցին, որ թեև այն ցրտադիմացկուն բույս է, բայց որոշել են ռիսկի չդիմել ու մինչ կանխատեսված ցրտահարությունը, հավաքել դաշտում մնացած վերջին բերքը:
ԱԻՆ «Հիդրոմետ» ծառայության կանխատեսումների համաձայն` հոկտեմբերի 27-28-ին Արարատի և Արմավիրի մարզերում օդի ջերմաստիճանը կհասնի 0-ից —2, հողի մակերևույթին` —3-ից —4 աստիճանի։
«Հիդրոմետ» ծառայությունն ու գյուղատնտեսության նախարարությունն այս մարզերի բնակչությանը խորհուրդ են տվել արագացնել բերքահավաքի հետ կապված աշխատանքները։