ԵՐԵՎԱՆ, 27 հոկտեմբերի — Sputnik. Վերջին շրջանում իմ ու Վիգեն Սարգսյանի գնահատականներն ընդհանրապես չեն համընկնում: Այս մասին այսօր լրագրողների հետ զրույցում ասաց ՀՀ առաջին փոխվարչապետի պաշտոնակատար Արարատ Միրզոյանը՝ պատասխանելով ՀՀ պաշտպանության նախկին նախարար Վիգեն Սարգսյանի վերջին քննադատություններին՝ կապված Հայաստանի արտաքին քաղաքականության հետ:
«Այնպես է ստացվում, որ այս վերջին շրջանում իմ ու Վիգեն Սարգսյանի գնահատականներն ընդհանրապես չեն համընկնում: ՀՀԿ խմբակցությունում ու կուսակցությունում կան մարդիկ, որոնց հետ զանազան հարցերում համաձայն ենք, սակայն Վիգեն Սարգսյանի հետ ոնց որ թե չենք կարողանում համաձայնվել», — ասաց Միրզոյանը։
Միրզոյանը անհիմն է համարեց նախկին նախարարի ձևակերպումներն այն մասին, որ Նիկոլ Փաշինյանը ձախողել է մեր արտաքին քաղաքականության ամերիկյան ուղղությունը։
Նրա խոսքով՝ Հայաստանը երբեք այսքան բարենպաստ արտաքին քաղաքական իրավիճակում չի եղել, որքան հիմա։ Իսկ նախկին իշխանություններից բավականին ծանր ժառանգություն է բաժին հասել։
Հիշեցնենք՝ Սարգսյանն այսօր ֆեյսբուքյան իր էջում գրել էր, որ ԱՄՆ-ի ազգային անվտանգության հարցերով խորհրդական Ջոն Բոլտոնի այցը «բյուրեղացրել էր Փաշինյանի ամերիկյան ֆիասկոն»։