ԵՐԵՎԱՆ, 27 հոկտեմբերի — Sputnik. Արցախի գինին, մուրաբաներն ու հյութերը (և իհարկե, դոշաբը) ԵԱՏՄ-ից առաջ էլ, հիմա էլ վաճառվել ու վաճառվում են Ռուսաստանում: Հիմա էլ արտադրողները կարողանում են օգտվել ԵԱՏՄ ռեժիմներից: Միության այլ երկիր ներմուծման ժամանակ նրանք ԱԱՀ-ի հետաձգում են ստանում, իսկ ապրանքի սանիտարական սերտիֆիկատն այլևս կրկնակի ստուգում չի անցնում:
Երևանում կայացած «Եվրասիական շաբաթ» տնտեսական ֆորումին մասնակցել էին նաև Արցախի Հանրապետության ներկայացուցիչները:
«Այստեղ հանդիպել ենք Ռուսաստանի խոշոր ցանցերի ներկայացուցիչների, որոնց հետ վաղուց աշխատում ենք: Հանդիպել ենք նաև Բելառուսի ու Ղազախստանի գործընկերների հետ: Ուղղակի նրանց հիմնական հետաքրքրվածությունն այս անգամ, կարծես թե, խմիչքներն էին: Սակայն ընդհանուր առմամբ, կապը պահպանվում է, և ԵԱՏՄ երկրներում մեզ չեն ներկայացվում այնպիսի պահանջներ, որոնք մենք չկարողանայինք կիրառել», — Sputnik Արմենիայի հետ զրույցում նշում է «Արցախ ֆրութ» ընկերության տնօրեն Արմեն Ծատրյանը:
Այժմ ընկերությունը նախատեսում է ստանալ սննդի անվտանգության ISO 22000 սերտիֆիկատ, որի համար արդեն մասնագետներ է հրավիրել ՀՀ Ստանդարտների ազգային ինստիտուտից` մշտադիտարկում կատարելու:
«Սա մեզ թույլ կտա ընդլայնել արտահանումը նաև եվրոպական երկրներ: Փոքր քանակություններ մենք արդեն իսկ վաճառել ենք Ֆրանսիա ու Լեհաստան, բայց ուզում ենք նոր փորձեր անել», — հավելեց Ծատրյանը:
Նշենք` Եվրասիական շաբաթին մասնակցել են մոտ երկու հազար հյուր` թե՛ ԵԱՏՄ-ից, թե՛ այլ երկրներից: