ԵՐԵՎԱՆ, 25 հոկտեմբերի — Sputnik. ՀՀ կառավարությունը քննարկեց ստվերային կառավարությունների մասին օրինագիծը։
Ընտրական օրենսգրքի փոփոխությունների նախագիծը կազմել են «Ծառուկյան» դաշինքի պատգամավորները։ Նրանք առաջարկում են, որ ընտրություններին մասնակցող կուսակցությունները ներկայացնեն իրենց առաջարկած կառավարության կազմը։ Այսպիսով ընտրողները կիմանան` ում է ուզում կուսակցությունը տեսնել վարչապետի ու նախարարների պաշտոնում։
Նշենք, որ դա հիմա էլ արգելված չէ։ Ցանկության դեպքում կուսակցությունները կարող են դրա մասին հայտարարել (նկատենք, սակայն, որ քչերն են այդ քայլին դիմում):
Արդարադատության նախարար Արտակ Զեյնալյանն ասաց, որ կառավարությունն այդ հարցը սկզբունքային չի համարում ու այդ հարցով առարկում չունի։
Հիշեցնենք` դեկտեմբերին Հայաստանում պետք է արտահերթ ընտրություններ կայանան։ Դրա համար Նիկոլ Փաշինյանը հրաժարական է տվել։ Նա ու նախարարները հիմա պաշտոնակատար են համարվում։