ԵՐԵՎԱՆ, 24 հոկտեմբերի — Sputnik. ՀԱՊԿ տարբեր կառույցներում շարունակվում են խորհրդակցությունները` գլխավոր քարտուղար Յուրի Խաչատուրովին փոխարինելու հարցի վերաբերյալ, այսօր ճեպազրույցի ժամանակ ասաց ԱԳՆ մամուլի քարտուղար Աննա Նաղդալյանը։
«Հարցի վերաբերյալ դեռ նորություն չկա։ Պետք է նշել, որ ՀԱՊԿ համապատասխան կառույցներում խորհրդակցությունները շարունակվում են։ Դրանք վերաբերում են կազմակերպության կանոնակարգի շրջանակում կոնսենսուս գտնելուն», — ասաց Նաղդալյանը։
Նրա խոսքով` ՀԱՊԿ կանոնակարգով նման իրավիճակ` գլխավոր քարտուղարին փոխարինելու գործընթաց, նախատեսված չէր։ Խորհրդակցում են այդ մեխանիզմի շուրջ։
Հանրությունն արդյունքների մասին կիմանա, երբ խորհրդակցությունների արդյունքները ներկայացվեն ՀԱՊԿ խորհրդի նիստին։
Ավելի վաղ Մնացականյանը նշել էր, որ Խաչատուրովի նկատմամբ քրեական գործը զուտ ներհայկական հարց է։ Նա վստահեցրել էր, որ արվում է ամեն բան, որ ստեղծված իրավիճակը որևէ կերպ չազդի ՀԱՊԿ-ի հեղինակության վրա։
Հիշեցնենք` հուլիսի 28-ին Երևանի ընդհանուր իրավասության դատարանի դատավոր Դավիթ Բալայանը Յուրի Խաչատուրովի նկատմամբ կալանավորումը որպես խափանման միջոց ընտրելու միջնորդության քննության արդյունքում նախ որոշել էր բավարարել միջնորդությունը, ապա մեղադրյալի նկատմամբ այլընտրանքային խափանման միջոց` գրավ կիրառելու որոշում կայացրել:
Որպես այլընտրանքային խափանման միջոց գրավը ճանաչվել էր թույլատրելի: Գրավի չափ էր սահմանվել 5 մլն դրամը, ինչը վճարելուց հետո Խաչատուրովն ազատվել էր արգելանքից:
Խաչատուրովին մեղադրանք է առաջադրվել 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով, այն բանի համար, որ նա այլ անձանց հետ նախնական համաձայնությամբ տապալել է ՀՀ սահմանադրական կարգը: