ԵՐԵՎԱՆ, 24 հոկտեմբերի — Sputnik. Հայաստանը մտադիր է կիրառել ունեցած ողջ գործիքակազմը, եթե օրակարգ մտնի ԵԱՏՄ-ին Ադրբեջանի անդամակցության հարցն, այսօր ճեպազրույցի ժամանակ ասաց ԱԳՆ մամուլի քարտուղար Աննա Նաղդալյանը։
«Գլազևի հայտարարությունը մեկնաբանել է ԵՏՀ կոլեգիայի ներկայացուցիչը` նշելով, որ նման հարց օրակարգում չկա։ ԵԱՏՄ հիմնարար փաստաթղթերում նշված է, որ կազմակերպության անդամ կարող է դառնալ այն պետությունը, որը չի գործել Կազմակերպության և նրա անդամների դեմ», — ասաց Նաղդալյանը։
Նրա խոսքով` եթե Ադրբեջանի անդամակցության հարցը ներառվի օրակարգում, Հայաստանը կիրականացնի այն բոլոր քայլերը, որոնք ունի իր գործիքակազմում։
Ավելի վաղ Ռուսաստանի նախագահի խորհրդական Սերգեյ Գլազևն ասել էր, որ ԵԱՏՄ դռները բաց են հետխորհրդային բոլոր երկրների համար։
Նրա խոսքով` եթե ԵԱՏՄ-ն ընդգրկի հետխորհրդային տարածքի բոլոր երկրները, ապա հակամարտություններ շատ քիչ կլինեն, ինչում շահագրգռված է Ռուսաստանը։ Միևնույն ժամանակ Գլազը նշել էր, որ հակամարտությունները պետք է լուծվեն բանակցությունների, խորհրդակցությունների և փոխզիջումների միջոցով։
ԶԼՄ-ներում բազմիցս շրջանառվել է ԵԱՏՄ-ին Ադրբեջանի հավանական անդամակցության հարցը։