ԵՐԵՎԱՆ, 24 հոկտեմբերի — Sputnik. Հայաստանի և Ադրբեջանի միջև օպերատիվ կապը գործում է, այսօր ճեպազրույցի ժամանակ ասաց ԱԳՆ մամուլի քարտուղար Աննա Նաղդալյանը։
«Կապն իսկապես գործում է, դա պարզապես հայտարարություն չէ»,- ասաց Նաղդալյանը` պատասխանելով այն հարցին, թե արդյոք այն գործել է Արցախում հայ զինծառայողի վնասվածք ստանալուց հետո։
«Կարող եմ միայն մի բան ասել։ Օպերատիվ կապը հաստատվել է», — ասաց Նաղդալյանը։
Նա նշեց, որ կապն ուղղված է խաղաղության մթնոլորտի ձևավորմանն ու պահպանմանը։
Հիշեցնենք` Փաշինյանն ավելի վաղ ասել էր, որ Դուշանբեում ԱՊՀ ղեկավարների գագաթնաժողովի շրջանակում Ադրբեջանի նախագահ Իլհամ Ալիևի հետ զրույցում պայմանավորվածություն է ձեռք բերվել սահմանին խաղաղություն պահպանելու, ինչպես նաև երկխոսությանն ու բանակցություններին հավատարիմ մնալու մասին։
Հոկտեմբերի 20-ին նա հայտնել էր, որ Ադրբեջանի իշխանությունների հետ հուսալի օպերատիվ կապ է հաստատվել, և անհրաժեշտության դեպքում ցանկացած տեղեկատվություն 30 րոպեի ընթացքում կհասնի Ալիևին և հակառակ ուղղությամբ։