ԵՐԵՎԱՆ, 23 հոկտեմբերի — Sputnik. Այժմ չի դիտարկվում Ադրբեջանի անդամակցությունը ԵԱՏՄ-ին, Երևանում «Եվրասիական շաբաթ» ֆորումի շրջանակում Sputnik Արմենիայի կազմակերպած մամուլի ասուլիսին ասաց ԵՏՀ առևտրի հարցերով Կոլեգիայի անդամ (նախարար) Վերոնիկա Նիկիշինան։
«Կարող եմ ասել, որ մեր օրակարգում նման հարց չկա», — ասաց Նիկիշինան։
Ավելի վաղ Ռուսաստանի նախագահի խորհրդական Սերգեյ Գլազևն ասել էր, որ ԵԱՏՄ դռները բաց են հետխորհրդային բոլոր երկրների համար։
Նրա խոսքով` եթե ԵԱՏՄ-ն ընդգրկի հետխորհրդային տարածքի բոլոր երկրները, ապա հակամարտություններ շատ քիչ կլինեն, ինչում շահագրգռված է Ռուսաստանը։ Միևնույն ժամանակ հակամարտությունները պետք է լուծվեն բանակցությունների, խորհրդակցությունների և փոխզիջումների միջոցով։
ԶԼՄ-ներում բազմիցս շրջանառվել է ԵԱՏՄ-ին Ադրբեջանի հավանական անդամակցության հարցը։