ԵՐԵՎԱՆ, 23 հոկտեմբերի — Sputnik. Աշխարհի բոլոր երկրները պետք է համագործակցեն կիբեռանվտանգության ոլորտում, այլընտրանք գրեթե չկա։ Այս մասին հայտարարեց ԱՄՆ-ի նախագահ Դոնալդ Թրամփի խորհրդական Ռուդոլֆ Ջուլիանին` ելույթ ունենալով Երևանում «Եվրասիական շաբաթ 2018» համաժողովի ընթացքում։
Նրա խոսքով` Հայաստանի նման փոքր երկիրը նույնպես չպետք է մոռանա կիբեռանվտանգության մասին։
Կիբեռհանցավորությունը տարեցտարի աճող սպառնալիք է։ Ջուլիանին նշեց, որ հիմա ըստ վտանգավորության այն կարելի է համարել թիվ մեկ հանցագործությունը, ընդ որում ոչ միայն ԱՄՆ-ում և Եվրոպայում, այլ նաև զարգացող երկրներում։ Համացանցն ավելի արագ է հասանելի դառնում, քան պաշտպանվելու հնարավորությունները։ Ցանցահենային հարձակումների թիվն ավելանում է։
«Ուստի պետք է մտածել ոչ թե այն մասին, թե ինչպես հետ մղել յուրաքանչյուր առանձին գրոհը, այլ այն մասին, թե ինչպես բացահայտել հատկապես վտանգավոր սպառնալիքները», — նշեց Ջուլիանին։
Նման աշխատանքը կարևոր կլինի պաշտպանության և բիզնեսի, ինչպես նաև կենսական կարևոր ենթակառուցվածքների համար. էլեկտրահաղորդումների գծեր, հիվանդանոցներ, բանկեր, իսկ ապագայում` ինքնավար ավտոմեքենաներ։
Ոչ մի երկիր միայնակ չի կարող դիմակայել հաքերային հարձակումների նման հոսքին։ Ուստի կիբեռանվտանգության ոլորտում համագործակցությունը ոչ միայն ցանկալի է, այլ նաև անխուսափելի։
«Եվ եթե մի երկիրն ունի արդյունավետ մշակում, չպետք է վախենալ այն մյուսներին հանձնելուց, որովհետև վաղը նրանք իրենց մշակումները կփոխանցեն ձեզ։ Միայնակ դիմակայելը անհնար է։ Եթե անվտանգության ոլորտում միշտ չէ, որ կարելի է համագործակցել, բայց կիբեռանվտանգության ոլորտում դա միակ հնարավոր տարբերակն է», — ասաց Ջուլիանին։
«Եվրասիական շաբաթ 2018» համաժողովին ժամանել են մոտ 2000 հյուրեր աշխարհի ավելի քան 20 երկրից։