ԵՐԵՎԱՆ, 23 հոկտեմբերի — Sputnik. Եվրասիական միությունը նոր հեռանկարային գործընկեր կունենա` Եգիպտոսը։ «Եվրասիական շաբաթ 2018» միջազգային տնտեսական համաժողովի ընթացքում այս մասին հայտնեց Եվրասիական տնտեսական հանձնաժողովի կոլեգիայի նախագահ Տիգրան Սարգսյանը։
ԵԱՏՄ-ն Եգիպտոսի հետ բանակցություններ է վարում ազատ առևտրի համաձայնագրի մասին։ Սարգսյանի խոսքով` Վիետնամից հետո Եգիպտոսը կլինի խոշոր շուկայի երկրորդ օրինակը, որի հետ կարելի է և պետք է համագործակցել։
Նա նշեց, որ ռուսական բիզնեսը հետաքրքրված է Եգիպտոսի արդյունաբերական գոտիներով և ԵԱՏՄ մյուս երկրների արդյունաբերողներին խորհուրդ տվեց հետևել այդ օրինակին։
«Անցած շաբաթ հանդիպել եմ Եգիպտոսի նախագահի հետ։ Նա առաջարկեց կազմակերպել գործարար համաժողով։ Մենք, իհարկե, կողմ ենք այդ գաղափարին», — ասաց Սարգսյանը։
Ինչպես նշեց ԵԱՏՀ նախագահը, տվյալ պահին հետաքրքիր բանավեճ է ընթանում ապագա համաձայնագրի վերաբերյալ, մասնավորապես, որոշ ապրանքային խմբերի մաքսատուրքերի հարցում։
«Եվ այստեղ պետք է զգալ բիզնեսի ոգին։ Պետք է տեսնել` եգիպտական շուկայում որ նախագծերն առաջնահերթ կլինեն մեր ձեռներեցների համար», — ասաց Սարգսյանը։
Սարգսյանը նշեց, որ գործարար համաժողովը կօգնի պատասխանել այդ հարցերին։