ԵՐԵՎԱՆ, 23 հոկտեմբերի — Sputnik. ԵԱՏՄ-ն առավել հաջողակ ինտեգրացիոն նախագծերից է, որը նպաստում է ժողովուրդների բարեկեցության բարձրացմանը։ Այդ մասին հայտարարեց Ռուսաստանի Հայերի միության նախագահ Արա Աբրահամյանը` այսօր ելույթ ունենալով Երևանում «Եվրասիական շաբաթ» համաժողովում։
Միության նկատմամբ հետաքրքրությունը տարեցտարի աճում է։ Համաժողովը լավ հնարավորություն է գործարարների միջև կապեր ստեղծելու համար։
«Եվրասիական շուկայի ահռելի ներուժը հետաքրքրում է տարբեր երկրների գործընկերներին։ ԵԱՏՄ-ն բախվում է լուրջ մարտահրավերների։ Հայաստանի դեպքում դա Թուրքիայի և Ադրբեջանի տրանսպորտային շրջափակումն է, Ռուսաստանի դեպքում` պատժամիջոցները», — ասաց նա։
Նա ընդգծեց, որ ԵԱՏՄ ներուժը մինչև վերջ օգտագործված չէ, և համոզմունք հայտնեց, որ նման լայնածավալ միջոցառումները թույլ կտան նոր կապեր հաստատել և նոր մակարդակի կբարձրացնեն տնտեսական կոոպերացիայի մակարդակը` ստեղծելով նոր աշխատատեղեր։